Pisiniat ilungersortut atuartullu angerlakaasut
- Illoqarfiup qameqattaarnera pissutigalugu misigisaqalaavissorpugut. Pisiniat kasuttoqattaartarput pisiniarusukkaluarlutik, pisiniarfilli qaminngatillugu isertissinnaanngilagut kallerummi innera qaminngappat aamma karsi qaminngassammat, Nuussuarmi Brugsen Nathaliami aqutsisoq Jørgen Hammond oqarpoq.
Nuummi innaallagiaq marlunngormalli kipisaqattaalerpoq. Kingullertullu sisamanngornerup unnuaani qamikkami ullup qeqqata siorna aatsaat ikeqqilluni.
Juulliaqqami decembarip 24-iani 85-nik ukioqalertussaq Søren Joelsen ilaquttaminit isumagineqarluarpoq:
- Ippassaq ualikkut paninnguara iserpoq imertaassimallunga uffalu imermik amigaateqanngiivittunga, ilaquttama isumaalugisimagaminnga.
Niuertarfik qaninnerusara Brugsen Nathalie ornittarpara, kisianni amigaatigut tamaasa pigineq ajorpai, pisarioqisumillu bussinut ilaaqqaarlunga aatsaat illoqarfiup qeqqanukartariaqartarpunga, aammami akikinnersiortariaqartarama, Søren Joelsen oqaluttuarpoq.
Atuartut angerlarput
Kangillinnguit atuarfiat Nuussuarmiittoq meerarpassuarnik atuartoqarpoq paatsiveerusimaarnerlu aamma tassani malugineqarpoq:
- Malunnaqaaq aalassattoqartoq, aammalu atuartut ilinniartitsisullu tamarmik nalornipput ilumut atuariartussanerlutik imaluunniit suliartussanerlutik, kisianni atuarfik ammaannarpoq.
Kisianni ippassaq sivisoorujussuarmik qaminngavugut qiianarsivugut aammalu imeerulluta, taamaammat atuartut amerlanerit angerlarput, meeqqalli ilaat aamma maaniiginnarput, Birgithe Geisler Kangillinnguani atuarfiup pisortaata tullersortaa oqaluttuarpoq.
79-nik ukiulik Inge Poulsen Rosbach utoqqaat ornittagaanni Pilutami ningiuuvoq:
- Utoqqaat peqatigiiffianni atugarliorpugut ulluni aggerfissaraluatsinni quasarsuarlu, taarsuarlu sialussuarlu atorpagut, taamaattumik juullimut niuffatsitsinissaraluagut pinngitsoorput aammami qarasaasiarput suli ajorpoq ikissinnaananilu.
Brugsen Nathaliami qamittooqattaarneq pissutaalluni nillataartitsiviit aserorput:
- Nalaataqarnerluppugut, kølerit marluk aserorput. Pisiniartartutsinnut uggornarpoq isertissinnaannginnatsigit tassami inuit amigaateqarput, isersinnaanngoraangamillu imermik pisiortortaqaat, qujanartumilli Nuuk imermeersumik imermik peqalaavissorpugut taakkulu inunnut iluaqutaagunaqaat, Nathaliami pisiniarfiup aqutsisua Jørgen Hammond oqaarpoq.
