- Nersornaaserneqarnera killitsinnaqaaq, ilaquttakka tapersersuisikka qujassutissaqarfigeqaakka, Martha Mikaelsen oqarpoq.Assi: KNI

Pisiniartitsisuunermiit siuttuunermut: Martha ukiuni 40-ni KNI-miinnerminik nersorneqartoq

Sulilernissaminut oqaloqatigineqarami, sulisitsisuminit aperineqarpoq 10-mut kisitsisinnaanersoq. Martha Mikaelsen ukiuni 40-ni taamanili KNI-mi atorfeqarpoq.

Martha Mikaelsenimut Tasiilameersumut sapaatip akunnerata siuliani pisoq immikkuullarilluinnarpoq.

Kulusummiu Martha Mikaelsen niuernermik ingerlatsivissuarmi KNI-p ataani pilersuisumi nuna immikkoortuani tunumi Tasiilami ullumikkut pisortaavoq. Taanna KNI-p ataani ukiuni 40-nik sulisimagami Dronning Margrethe aappaata nersornaasiuttagaanik sølviusumik saqqarmiulerneqarpoq.

Dronningip nersornaaasiuttagaa sølvisoq

* Nersornaaserneqassagaanni, sullivimmi ataatsimi sivikinnerpaamik ukiuni 40-ni ataannartumik sulisariaqarpoq.

* Sulisitsisoq sulisuminik nersornaasiinissamut innersuussisussaavoq. 

* Nersornaat qallunaatut innuttaasusilinnuinnaq tunniunneqarsinaavoq.

Tusarfik: Isumaginninnermut nunamullu naminermut ministereqarfik

Martha Mikaelsen niuernermik ingerlatsivissuaq, naalagaaffimmit suli pigineqarallarami Den Kongelige Grønlandske Handelimik ateqartumi, sulilerpoq. Niuernermik ingerlatsivissuaq nunatta 1986-imi tigummagu, KNI-mik ateqalerpoq.

Pisiniartitsinermi karsi taamanikkut atortagaat puiguikkiussaata ilagaat.

Nersornaaserneqartup oqarnera naapertorlugu suliffia ineriartupiloorsimavoq.

- Suliffik taamanikkut KGH-jugallarmat soorunalimi ullumikkornit allaanerujorujussuuvoq. Jaappilaaimmit taamani aggersarneqarpunga. Taamani aperivaanga sulisinnaanersunga, taava misilitsippunga. Ullumikkut eqqarsaatigissagaanni nuannersumik eqqaamasarpara. Taamani aperaanga 10-mut kisitsisinnaanersunga allassinnaanersungalu, taamani taakku angusiffigaakka.

Inuusuttuulluni Kulusummi sulileqqaarpoq

Martha Mikaelsen Kulusuup pisiniarfiani sulileqqaarami 18-inik ukioqarpoq. Taamanikkullu atortorissaarutit allaanerungaartut, taanna eqqaamasalikkersaarpoq.

- Taamani sulileqqaarama kassemiittaratta, kasse atortagarput taanna ullumikkumut allanngorsimanera maluginerpaanikuuara. Taamanikkut atorfineqqaarpunga toortagarujussuit sakkortuumik tooqqaarlugit, sanianiittoq kaaviserujussuarlugu. Taava ullumikkut regnemaskinatut isikkulinnut saakkiartuaarneq, ullumikkut atortorissaarutit tuuginnartakkat, uannut malunnarnerpaanikuupput.

Taanna atorfimmini ukiuni 40-ni sulisimanermini inuttut aamma ineriartorsimaqaaq.

- Oqaannarsinnaavunga, suliffiga ilinniarfigaara, ukiuni taakkunani. Qummut ingerlarujoorsimavunga, sulisuminngaanniit aqutsisumut, massakkullu regionschefitut

atorfeqarninnut pilersuisup ineriartortippaanga.

58-inik ukiulik Martha Mikaelsen, KNI-p nunap immikkoortuani tunumi pisortaasoq, ukiuni aggersuni suli sulinissani naatsorsuutigaa.

AAMMA ATUARUK Pilersuisumi pisiassat nutaat 700-it nioqqutaalissasut

- Soorunalimi ukiut 40-t pilersuisumi sulisimanera uanninngaaniit pingaarutilerujussuuvoq. Peqqitsillunga sulerusuppunga, kisianni aamma eqqarsaatigaara, inuunerma ilaani uanga nammineq nuannarisakka peqqinninni aallunnerorusullugit. Taamanikkussamut qaquguusanersoq, ukiut aggersut takutikkumaarpaat.

Martha Mikaelsen, Sisimiuni KNI-p kiffartuussiviani nersornaaserneqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat