Pisiniartitsisoq saassuneqartoq
Allattoq Jaaku Lyberth
marsip 08-at 2007 16:59
Nuummi blok P-p eqqaani Brugseneeqqami pisiniartitsisoq inuusuttunit tallimanngormat saassunneqarpoq.
Saassussisut imigassamik tillikkaluarsimapput, pisiniartitsisorli malersuilersimavoq, illoqarfiullu qeqqata missaannut pereerlutik saassunneqarpoq, persuttarneqarluni.
- Pisimasoq pillugu oqaaseqarusuppallaanngilagut, misissuineq suli ingerlammat, politiit eqqartuussisuserisuat Bjørn Bay radioaviisimut oqarpoq.
Saassussisut qassiusimanersut politiinit aamma oqaatigiumaneqanngilaq.
Saassunneqartoq Dronning Ingridip Napparsimmavissualiaanneqarpoq, tassanilu misissorneqarluni. Qujanartumillu ajoquserpallaarsimanngilaq.
Saassusseqataasimasutut pasineqartoq ataaseq marsip 13-iata tungaanut tigummigallagassanngortinneqarsimavoq.
