Pisiniarfiutillit: Meerartaarnermut atatillugu aningaasaateqarfiliornissaq isumaqatigaarput

Taakku ilagaat pisiniarfiutillit marluk, taakkulu pisiniarfiit aningaasaateqarfimmut siunertamut pilersinneqartumut aningaasanik amerlanngitsunik akiliisalersinnaanerat takorloorsinnaalluarpaat.

- Isumassarsiatsialaasutut oqaatigisinnaavara. Soorunami kingorna aningaasanik tunineqarsinnaanissamut aningaasat aningaasaateqarfimmut akiliutigineqartartussat qanoq amerlatiginissaat apeqqutaavoq, kisianni isumassarsialattut nipeqarpoq. Suliffeqarfeeraateqartuullunimi sulisorisat meerartaarnermut atatillugu sulinngiffeqartarnerinut tunngatillugu pisariaqartinneqarpoq. Aamma suliffeqarfimmut mikisumut meerartaarnermut atatillugu sulinngiffeqartunut akiliuteqartarneq akisuukasiummat, Nuummi timersuutinik pisiniartarfimmik piginnittoq Morten Jørgen Heilmann oqarpoq.

Taanna aamma Agnethe Egede Mathiassenimit Qaqortumeersumit ilalerneqarpoq. Taanna atisaarniarfimmik Butik 99-imik piginnittuuvoq. Piffissami suliffeqarfeeqqat aningaasatigut artorsaateqarfianni meerartaarnermut atatillugu aningaasaateqarfiliortoqarnissaa suliffeqarfinnut mikisunut iluaqutaaginnassaaq, oqarpoq nangilluni:

- Kujataa maannakkorpiaq ilungersunartumik inissisimaffiuvoq. Taamaammat ikioqatigiittariaqarpugut immitsinnuinnarlu eqqarsaatiginata. Peqatigiilluta aningaasaateqarfimmut akilersueqataasariaqarpugut. Uanga aningaasaateqarfimmik taama ittumik pilersitsinissamik isumassarsiaq tapersersorpara, taamaalillutami ataatsimoorluta kivitseqatigiissinnaassagatta, Agnethe Egede Mathiassen Qaqortumeersoq oqarpoq.

Naaja Nathanielsenip inatsisissatut siunnersuutaa sapaatit akunnerat kingulleq marlunngornermi siullermeerneqarmat Naalakkersuisunit ilalerneqanngilaq. Aammattaaq Nunatsinni sulisitsisut peqatigiiffii meerartaarnermut atatillugu aningaasaateqarfiliornissaq pillugu apeqqummi isumaqatigiinngillat.

Meerartaarnermut atatillugu aningaasaateqarfimmik pilersitsinissaq pillugu inatsisissatut siunnersuut siullermeerneqareermat Aningaasaqarnermut Akileraartarnermullu ataatsimiititaliamut ingerlateqqinneqarpoq pilersaarutillu malillugit sisamanngornermi novembarip 7-iani aappassaaneerneqassalluni.