Pisiniarfissuarmi eqqaassivoq

Hollandimi niuertarfissuarmi alianartumik ullumi pisoqarpoq. Angut aallaat eqqarasuartaat atorlugu sumut tamaanga eqqaassilermat inuit tallimat inuartarineqarput, eqqaassisorlu kinguninngua imminut toquppoq.
apriilip 09-at 2011 13:26

Arnaq niuertarfissuarmiittut ilaat tyskit nutaarsiassaqartitsiviannut dpa-mut ima oqaluttuarpoq.

- Angut tassanngaannaq eqqaassilerpoq uagullu qimarratilerpugut, alla tusaanngilarput "da da da da"-arpalussuaq. Tassa ajoq. Uippaleqqaqaagut qalleraatiisaannarlu paarmorluta qimanaaniarsaraluta, .

Pisoq alianartoq illoqarfeeqqami Alphen aan den Rijn-imi pivoq, taanna Amsterdamimit 40 kilometerinik kujasinnerusumiippoq.

Borgmesteri pisup kingorna nassuiaanermini oqaatigaa, angut niuertarfissuarmut De-Ridderhof-imut ullo'qeqqariitsiartoq iserami eqqissisimasimasoq.

- Ullormi matumani seqinnarissuup ataani upperiuminaalluinnartumik pisoqarfiusumi ikiligaasut inuartarineqartullu tamaasa ilaqutaalu misiginneqatigeqaagut, borgmester Bas Eenhoorn oqarpoq.
Niuertarfissuarmi najuuttut ikiorserasuarnissaat pillugu tarnip pissusaanik ilisimannittunik allanillu ikiuuttussanik niuertarfissuup qanitaani oqaluffimmi piareersimatitsisoqarpoq.

Alphen aan den Rijn-imi sapaatip-akunnera kingulleq alianartumik allamik pisoqarfiuvoq, taamani inuit marluk aallaaneqarlutik toqutaapput marlullu ikiligaallutik. Suli nalunarpoq ullumi pisoq taamani pisunut attuumassuteqarnersoq.