Pisiniarfinni tillinniarnerit millionilikkaanik naleqarput
- Kisitsisinngussagutsigit aningaasat 2 millionit koruunit missaat ukiumut annaasaqaatigisarpagut, erseqqissaatigissavarali tamanna missingersuutaannaammaat, Brugsen Nuummi pisortaq Kim Jensen oqarpoq.
Kalaalimerngit soorlu mattaat, savallu quttoraat neqillu allat tillinneqakkajupput, kisianni viinnit, immiaaqqat, tupat, DVD-t, spilit Playstationimoortut allaallumi fladskærmit tillinneqarsinnaasartut, Kim Jensenip oqaatigaa.
Niuertoq Erik Brogaard, pisiniarfinnik Kamimmik taaguutilinnik piginnittoq oqarpoq 1,5 millionit koruunit tikillugit ukiumut annaasaqaatigisarlugit, tillianniallu iliuuserisartagaat allanngoriartortuarput:
- Tillinniat ilaat sikaritsinik kartoninik pisiumariarlutik, kartoni isaanneqartorlu tigupallariarlugu arpallutik qimaasarput. Pisiniartitsisulluunniit eqqaaniinngillatsiarnera tillinniat atorluarniarsarisarpaat, sikaritsit allallu tillittarlugit. Neqilli amerlanertigut tillinneqartarput, kavaajamminnullu ilaatigullumi ilupaqutinut toqqorsinnaasarlugit. Tillinniat videokkut immiuttarpagut, ilaqarporli tamakkuninnga soqutigisaqanngitsut tillinniaannartartunillu, Kamimmik piginnittoq Erik Brogaard oqarpoq.
Brugsenimi aamma videomik immiussissummik peqarpoq saniatigullu paarsisoqarluni, taamaattoq ukiumut tillitat 2 millionit koruunit missaanniissangatinneqarput.
Nuummi pisiniarfinni tillinniat ukioq manna 426-t nalunaarutigineqarsimapput, siornalu 512-iullutik. 2007-imilu 495-iullutik.
Nalunaarutigineqartartut amerlassusaat taamaasillutik allanngorpiarneq ajorput.
Meeqqat, inersimasut utoqqaanerusullu tillinniartartut Brugsenimit Kamimminngaanniillu nalunaarutigineqarpoq, tillinniakkajuttunillu aamma peqarluni.
Inuit taakkorpiaat 50-it 60-illu akornanniittut Brugsenimi tillinniakkajuttuusut Brugsen Nuummi pisortaq Kim Jensen oqarpoq.
Politiit ilaatigut aggersarneqartarput, tillinniarlu politeeqarfiliaanneqartarluni, akunnialunnguilli qaangiutiinnartut iperagaaqqittarpoq, kingumullu tillinniaqqittarluni. Tamanna kipiluttunarsinnaasoq, Kim Jensenip oqaatigaa.
Tillinniaqattaartuaannartut politiinit pineqaatissinneqartariaqaraluartut ilaatigut aamma oqaatigalugu.
Pisiniarfinni tillinniartarnerit ajornartorsiutaanerat, Nuummi Niuertut Peqatigiiffiata arajutsisimanngilaa. Peqatigiiffiup siulittaasua Jan Køhlert oqarpoq tillinniartarnerit 2010-mi eqqumaffigineqarnerulernissaat siunniunneqassasoq.
Politiit kisitsisaataat naapertorlugit pisiniarfinni tillinniarsimasutut Nunatsinni nalunaarugitineqartut katillugit 605-iupput, taakkunanngalu tassa 426-t Nuummi pisimallutik.
