Pisiniarfinni siunnersuisoqatigiit uummarissarniarneqassapput

Sumiiffiit ilaanni ataatsimiisitsoqassaaq sumiiffinnilu allani pisiniarfiit siunnersuisoqatigiivinik pioreersunik nutarterisoqassalluni.

- Qanimut naapilluni oqaloqatigiinneq pitsaanerpaasoq tamatta nalunngilarput. Taamaattumik sumiiffinni assigiinngitsuni pissutsinik pisariaqartitanillu ilisimannittut, tassaasut niuertut pisinarfinnilu pisortat, pisisartunik oqaloqateqarnissamik akisussaaffilerneqarput, attaveqaqatigiinnermi pisortaq Shiva Xenia Brunsvig oqarpoq.

Nunatsinni sumiiffinni arlaqartuni Pilersuisoq innuttaasunik ataatsimiisitsisareerpoq. Kingullermik Qeqertarsuarmi pisiniarfimmi siunnersuisoqatigiinnik pilersitsisoqarmat orniguttut amerlasimapput.

Kisianni sumiiffiit ilaanni pisiniarfinni siunnersuisoqatigiit ingerlatiinnarnissaat ajornakusoortartoq, attaveqaqatigiinnermut pisortap nassuerutigaa.

- Niuernermut pissutsit pillugit pisisartutsinnut paasissutissiisarnissatsinnik pikkorinnerulertariaqarpugut. Ilisivinni tamani ajoraluartumik qanorluunniit qinigassaqanngilaq, taamaattumik pisisartutta aamma pingaarnersiuinissatsinnik ikiortariaqassavaatigut, Shiva Xenia Brunsvig oqarpoq.

Illoqarfiit nunaqarfiillu 200-t sinnerlugit inuttaqartut siullermik Pilersuisumit oqaloqatigineqassapput.