Pisiniarfimmi aallaaneqartoq kinaanersoq naluaat
Københavnimi illoqarfiup immikkoortortaani Frederiksbergimi politiit angut kioskimi savilersortoq ullaap tungaani aallaarsaralugu toqutaat kinaanersoq ilisimaneqanngilaq.
- Pappilissanik kinaassutsimut uppernarsaataasinnaasunik tigummiaqanngilaq, naalagaaffiup inatsisileritooqarfiani inatsisileritooq Birgit Gammelgaard Københavnimit oqarpoq. Taanna qanoq pisoqarneranik misissuisussat pisortaattut toqqarneqaqqammerpoq.
Politeeq kinaluunniit sulinermini aallaasersorsimatillugu naalagaaffiup inatsisileritooqarfianit qanoq pisoqarsimanersoq misissuisoqartarpoq. Politiip ilinniarsimasani naapertorlugit aallaasersorsimanersoq imaluunniit pisinnaatitaaffini sinnerlugit pisariaqanngitsumik aallaasersorsimanersoq ilanngullugit misissuiffigineqartarput.
Angutip 45-t missaannik ukioqassangatinneqartup kioskimi pisiassat anaatamik sequtsersimavai. Savimmillu qunusaaraluni pilermat politiit unitsinniarlugu marloriarlutik angutip tungaanut igissimapput.
Angut politiinit eqqorneqarsimanersoq eqqorneqarsimannginnersorluunniit Birgit Gammelgaardip ullup qeqqata missaani oqaatigisinnaasimanngilaa.
- Angutip timaa toqungasoq ullup ingerlanerani misissorneqareerpat aatsaat paasissutissiisinnaavunga, Birgit Gammelgaard oqarpoq.
