Pisiniarfik akunnerni marlunni ammasoq: Corona Arsummi tuniluuppoq

Corona Arsummi tuniluuppoq.

Tamanna pissutigalugu nunaqarfimmi innuttaasut 70-it missaanniittut akornanni tunillatsissimasut mattusimassapput, assanut tunillannartuiaat atorneqaqqilissaaq aamma imminnut qanillinaveersaassapput.

Tuniluuttoqarnerali aamma Pilersuisumi sulisut ilarpassuisa coronamik tunillatsissimanerannik kinguneqarpoq. Taamaalilluni ammasarnermisulli ammatitsisinnaanngitsut, Arsummi najugalik, Jakku Kristensen oqarpoq.

- Soorlu pisiniarfik ippassaq ammavoq qulininngaanniit ullup qeqqanut, taanna oqarpoq.

Innuttaasunut kissartuussivimmi kiserliornalaartoq

Pisiniarfik sisamanngornermi nalunaaqutaq 13.00 aatsaat ammarpoq. Nalinginnaasumik taanna qulingiluanit sisamat tungaanut ammasaraluarpoq.

- Tassami naleqqussarput. Nalunngilarput taannaannaq ammaffigissagaat. Taamaattumik taassuma ammanerani niuertarfiliarpugut. Soorunami ippinnarpoq, Jakku Kristensen oqarpoq.

- Qanermut assiaqut soorunami ullumikkut atorparput. Manna inukeqigami tuniluunneq pakkersimaarniarlugu pisiniarfimmukaraangatta qanermut assiaquteqarnissarput pisariaqarpoq.

AAMMA ATUARUK Coronap allannguutaata ilaata CA.5-ip tuniluunnera ernummataasariaqanngitsoq

Nunaqarfik tamakkerlugu ulluni makkunani inoqarpianngivippoq.

 - Silami meeraqarneq ajorpoq, taavalu inuit ataasiakkaaginnaat takusassaasarlutik. Niuertarfimmut iserluni aamma malunnarpoq imatut inoqanngitsoq, Jakku Kristensen tunillatsissimanngitsoq oqarpoq.

Taanna kommunip innuttaasunut sullissiviani sulivoq, taassumalu piffissaq maannakkut kiserliornalaartoq oqaatigaa.

Akiuussusersuisoqaqqilersoq

Nunatta nakorsaaneqarfiani nakorsap, Paneeraq Noahsenip sineriammi coronamik tuniluuttoqaqqilersoq uppernarsarpaa.

Aasaq mannali tuniluuttoqarnerani napparsimarululertoqarnissaa naatsorsuutiginagu.

Ukiap ukiullu ingerlanerani nutaamik tuniluuttoqaqqilernissaa ilimanarluinnarpoq, taamaammat akiuussusersuineq nutaaq aallartinneqarpoq.

Tunngaviusumik 50-ileereersimasut ukiuoqqortunerusullu aamma inuit timiminni akiuussutissakitsut akiuussuserneqarnissamik akiuussuserneqaqqinnissamilluunniit tunngaviusumik kisimik neqeroorfigineqassapput.

- Ukiut napparsimarululernissamut aallarinarnerpaapput. Taamaammat utoqqaat akiuussuserneqarnerminnik iluaqutisserneqarnerpaassapput, nakorsaaneq, Henrik L. Hansen oqarpoq.