Pisiniarfiit imminnut unammillernersut misissorneqalerpoq

Ulluinnarni pisiassat nalinginnaasut akitsoqimmata Kalaallit Nunaata sineriaani pisiniarfiit arlalinnik immikkoortortallit imminnut unammillernersut Unammillertussaanermik nakkutilliisut misissornialerpaat. Pisiassat akitsoriartuinnarput. Kalaallit Nunaanni naatsorsueqqissaartarfimmiit kisitsisit takutippaat qajuusat sukkullu ukiup kingulliup ingerlanerani 5 procentimik akitsorsimasut. Pisiniarfiit arlalinnik immikkoortortallit, Pisiffik, Brugsen, Kamik Pilersuisullu imminnut unammillinnginnerannik akitsuinerit peqquteqarnersut Unammillertussaanermut nakkutilliisunit misissorneqarnialerpoq.
juulip 21-at 2008 16:38

Nakkutilliiviup allaffiani pisortaq, Nicolai Odgaard Radioaviisimut oqarpoq, ulluni makkunani akitsuinerit pisiniarfiit unammillinnginnerannik peqquteqarnersoq misissoreerunikku, nalunaarusiap ukiamut naammassinissaa naatsorsuutigalugu. Taassuma saniatigut pisiniarfiutillit taakku sisamat naatsorsuutaat, pilersuinerat iluanaarutaallu aamma misissorneqassapput. Nicolai Odgaard oqarpoq, iluanaarutit annertussusaasa takutissinnaagaat unammillertoqarnersoq, imaluunniit pisiniarfiit unammillernissartik eqqarsaatiginagu iluanaarutissatik qaffanniaannarlugit piumasaminnik pisiassanik akitsuisarnersut. Atuisut akiliutigisartagaat ataatsimut isigalugit ukiup ataatsip ingerlanerinnaani 5,4 procentimik qaffassimasut Kalaallit Nunaanni naatsorsueqqissaartarfimmi kisitsisit takutippaat. Danmarkimi atuisartut siunersuisoqarfiata aamma akit qaffakkiartuinnarnerat isumakulunnartoqartippaat, Unammillertussaanermullu nakkutilliisoqarfik misissueqqusimallugu, taakkualu nalunaarusiaat aamma ukiap ingerlanerani saqqummissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq