Pisimasoq alianartoq naammaginartumik naammassisariaqarpoq
Ataatsimeeqatigiinnissami meeqqat 22-t angajoqqaminnit ilaqqutaminnillu qimagutitaallutik 1951-imi Danmarkimut aallartinneqartut pillugit oqaluuserininnissaq isumaqatigiissutigineqarpoq. Pisimasoq tamanna oqaluttuarisaanermi oqimaatsuuvoq, Kuupik Kleist oqarpoq.
- Tamassuma sapinngisamik torersumik naammassineqarnissaa anguniarneqarpoq. Qanga pisimasunik immitsinnut artukkertuaannarsinnaanngilagut, Kuupik Kleist ippassaq tusagassiortunik katersortitsinermi oqarpoq. Pisimasup saqqummiunneqartarnerani inuit pineqartut meeraanerminni inuusuttuunerminniluunniit misigisimasaminnik kingunerlutsitsiffigisinnaasaminnik misigisaqartinneqartarput.
- Utoqqatsertoqassanersoq, isumakkeerininnittoqassanersoq misissueqqissaartoqassanersoq imaluunniit saammaasseqatigiittoqassanersoq pingaarnerunngilaq, uannulli pingaaruteqarpoq inuit pineqartut arlaannaatigulluunniit ingerlaqqinnissaat, sapinngisamik qamuuna eqqissiniassammata, Naalakkersuisut siulitaasuat Kuupik Kleist oqarpoq pisimasup tamassuma torersumik naammassineqassaanik kissaateqarluni.
Kuupik Kleistip ministeriunerullu ataatsimiinnerminni ilaatigut eqqartussavaat, CO2-mik mingutsitsineq pillugu Nunatta Danmarkillu isumaqatigiissuteqarnissaat, Nunatsinni immap assiliortoqarnissaa, pingaartumik kitaata sineriaani immap assiliortoqarnissaa, kiisalu danskit politiivisa isertortortumik paasiniaasartuisa kalaallit politikeriinik isertortumik alaatsinaanneqartarnerannik paasissutissiisimaneq.
Kalaallit Inuiattut akuerissaanerat pillugu Naalagaaffinnut Peqatigiinnut nalunaaruteqarnissamut periusissat aamma oqaluuserineqassapput.
