Pisiffiup ukioq-manna angusani naammagisimaarpai

Atugassanik nioqquteqarfiup Pisiffiup 2013-imut naatsorsuutai, akileraarutit peereerlugit 59,7 millionit koruuninik sinneqartoorfupput - imaluunniit ukiumut siulianut naleqqiullugu 2 millionit koruuninik amerlanerullutik.
marsip 21-at 2014 14:55

Pisiffiup pisortaata, Per Steen Larsenip, naatsorsuutit naammagisimaarpai. Inuiaqatigiinni aningaasaqarniarnerup nikeriarpallaarsimannginnera, pingaartumik eqqarsaatigigaanni.

Pisiniarfiit kaaviiaartitaat 10 millionit koruuninik amerlipput, 973 millioner koruuninngorlutik.

Naatsorsuutit saqqummiunneqarnerannut atatillugu Per Steen Larsen oqarpoq, unammillerneq sakkortusisimasoq.

- Aningaasat pisissutaasinnaasut annikilliartornerat ilutigitillugu malugaarput. Pisisartut akinut eqeersimaarnerulerput, neqeroorutitsinnillu annertunerusumik atuilerlutik, bonusiClub-erpullu 22.000-inik maanna ilaasortalereerpoq.

Aammattaaq erseqqissarpaa ukiumut matumunnga naatsorsuutit inerneriumaagaat aningaasaqarniarnerup uninnganeranit sunnerneqarumaartut.

- Naatsorsuutigaarput akissarsiat pisissutaasinnaanerisa apparnissaat, taamalu pisissutaasinnaasut. Suliffissaaleqinerup qaffannissaanut ingerlavugut, inoqutigiillu aningaasartuutaasa qaffannissaannut, assartuinermut akit qaffanneqarnerisa sunniinerisigut, Pisiffiup pisortaanera nalunaaruteqarpoq.