Pisiassat akisunerulissapput
Tamanna pivoq Royal Arctic Linep ukiup tulliani qaammatini pingasuni siullerni pisiassanik assartuutit Aalborgimiit tikittut akuttunerulernissaat aalajangiummassuk.
Pisiffimmullu pisinianut tamanna eqquissaaq, Pisiffimmi Pisortaanerup, Per Steen Larsenip, naqissuserpaa:
- Takusinnaavara ukiut arlaqanngitsut qaangiummata asserpiaanik pisoqarmat ingerlatseqatigiiffimmi pisiassat naammattut tikisinngitsoortarsimavaat ingerlatsinitta piareersimaffiginngimmagu. Pisiniarfik ataaseq pisiassaatikinneruleraangat alla malinnaasarmat, taamaattumik piareersarluarnerussaagut, Per Steen Larsen, KNR-imut taama oqarpoq.
Aamma atuaruk RAL sipaartariaqalersoq
Ilulissat, Aasiaat, Sisimiut, Maniitsoq, Nuuk Qaqortorlu RAL-ip sipaarniarneranit kisimik ajornerusoqalernissaa ilimagissanngilaat. Illoqarfinni nunaqarfinnilu KNI Pilersuisup pisiniartartui aamma eqqugaassasut KNI Pilersuisup pisoortaanerata ilimagaa:
- Kingunerissavaa ullumikkornit pisiassat nutaannginnerulaartut pisiarineqartalissasut. Tamassumalu kingunerisassaata ilagaat umiarsuit atornagit timmisartukkut assartuisoqalissasoq, tamannalu pisiassaatitsinnut akisunerulersinnaavoq, Finn Fabricius, KNR-imut taama oqarpoq.
Ilulissani Aasiannilu Pisiffimmut pisinniat inissimanerisa kingunerissavaa qaammatini pingasuni Aalborgimiit assartuussineq akuttuneranit eqqorneqarnerlunnerpaassapput, Pisiffiup pisortaanera, Per Steen Larsen, oqarpoq.
- Illoqarfinnut taakkununnga marlunnut nerisassat nutaat tungaatigut kinguneqartussaavoq, Per Steen Larsen, oqarpoq.
Ullumikkut pisiassat assartorneri taama isikkoqartillugit pisiassat nutaajutillugit pisisartunut apuunniarneri Pisiffimmut oqittuinnaaneq ajorpoq. Taamaattumik Pilersuisup pilersaarutai assigalugit timmisartukkut assartuunneqaratarsinnaapput. Pisisartunullu tamanna kingunerlussaaq.
- Pisiassat ajortiasut umiarsuakkut nassinnagit timmisartukkut nassiutissanerlugit aalajangigassarilerparput. Akisunerulernerannillu kinguneqaratarsinnaavoq, pisiassallu arlallit akitsornerat attanneqarsinnaanngillat, taamaattumik tunisassiariunnaarnissaannik kinguneqartitsisinnaavugut, Per Steen Larsen, oqarpoq.
Assartuussat Aalborgimiit tikisinnissaat sivisunerulernerat Pilersuisumi sulisunut suliassanik amerlisaassaaq:
- Pisiassat ulluni amerlanerni toqqortarilissavagut, uagutsinnullu aningaasartuutaanerulissaaq pisiassallu inissaqartinniarnerat annertunerulissaaq, KNI Pilersuisup pisoortaanera, Finn Fabricius, KNR-mut taama oqarpoq.
