Pisassinneqartoq attartornissamik suli isumaqatigiissuteqarsimanngilaq

Piginneqatigiiffik Ilulissani aalisartunit pigineqartoq North Greenland Seafood saarullittassaminik 1000 tonsinik suli aalisalinngitsoq aalisarfissamut piffissarititaq naavoq.

Piginneqatigiit namminneerlutik aalisariutaateqanngillat saarullinniarnissaallu aggustip 22-ani killeqarpoq.

- Iluatsinngitsoorpoq, aalisarnermut naalakkersuisoqarfimmi pisortaq Amalie Jessen ilisimatitsivoq, nangipporlu:

- Piginneqatigiiffiup North Greenland Seafoodip aalisarfissamut piffissaliussaq sivitsorumagaluarmagu itigartinneqarpoq, allamilli periarfissamik misissuivugut ilaatigut misissorlugu piumasaqaat aalisarnermut inatsimmut naapertuunnersoq, Amalie Jessen oqarpoq.

Naalakkersuisoqarfimmi pisortap qanoq aaqqiiniartoqarnersoq nassuiarumanngilaa, radioaviisimiilli Royal Greenland A/S suleqatiginiarneqartoq paasivarput.

Royal Greenland A/S saarullittassanik agguaanermi 1000 tonsinik pisassinneqarpoq.