Pisassiissutit ikilippata aalisartut ikilissapput

Aalisarnermut naalakkersuisoq Ane Hansen Sisimiuni Polar Fishimi oqalugiarnermini Sermitsiaq malillugu taamak oqarpoq.

- Ullumikkut aalisarnermut annertuumik ajornartorsiuteqarneq ukiorpassuarni attuerusussimannginnermit pivoq. Aalisariaatsit nutaaliat atornerisigut aalisakkat inuussutigisavut aalisapilunneqarnermikkut innarlerneqarput. Pisuussutit - aalisakkat - nunatsinni isertitaqarnissatsinnut pingaarnerpaat taama atupilunneqartiginertik attasinnaanngilaat. Taamaattumik aalisartut ikilisartariaqarpavut, Ane Hansen oqarpoq.

Aalisarnermik naalakkersuisup naatsorsuutigaa aalisartut 20 procentii allamik suliffissarsiortariaqassasut soraarninngorlutilluunniit.

- Uuliasiulissagutta sulisussat ilaat suliffissaqartissinnaaniarlugit ilinniartitsinerit ingerlanneqarnissaat tulluassaaq, Sermitsiamut taama oqarpoq.

Aalisarnermut atortut pillugit saqqummersitsineq Polar Fish ulluni tulliuttuni marlunni suli ingerlanneqassaaq, aqagulu ullaakkut radioaviisimi saqqummersitsineq pillugu tusagaqarnerusinnaavutit.