Pisassiissutit amerlineqanngillat
- Maannamut aalisarnermut piniarnermullu pisassiissutinit sinneruttuusinnaasut qulaajarsimalerpagut agguaaqqittoqarsinnaanera allatulluunniit iliorluni pisassiissutaareersut atorluarneqarnerisigut oqilisaassisoqarsinnaanera nalilersoqqipparput, Ane Hansen tusagsssiutinut nalunaarummini oqarpoq.
Saarullinniarnermit pisassiissutaasut sinneri maannamut 1.000 tonsit missaanniittut nunami namminermi tunisassiassanut aamma avammut tunineqarsinnaasunngorlugit ullumimiit ammaanneqarput.
Aqutsiveqarfinni Qeqertarsuup Tunuani, Uummannami aamma Upernavimmi qaleralittassiissutit qaffanneqannginnissaat Naalakkersuisut aalajangiusimaannarpaat.
- Qaleralinniarneq piujuartitsinermik tunngaveqartumik ingerlanneqassaaq aamma imminut akilersinnaasunngortinneqarnissaa anguniarneqarpoq taamaalilluta akit pitsaanerusut angujumallugit. Tamanna uggornaraluartumik pisassiissuteqaqqittarnikkut angusinnaanngilarput, Ane Hansen erseqqissaavoq.
Aqutsiveqarfimmi Qeqertarsuup Tunuani qaleralittassiissutit sinneruttut suli 200 tonsiummata tamaani qaleralinniarneq 1. december 2011 ammaqqinneqassaaq.
Naalakkersuisut Great Greenland A/S suleqatigalugu aalajangerput ameerniarfiit nutaat 1. december 2011-mi ammarneqassasut.
Arfernut tunngatillugu Naalakkersuisut arfernut assigiinngitsunut pisassiissutaasartunik imaaliallaannarlutik allannguuteqartitsisinnaanngillat, Kalaallit Nunaat nunarsuarmioqatigiit peqatigalugit arferit pillugit aqutsinissamik isumaqatigiissuteqarmat. Taamaattorli pisassiissutit sinnerinik agguaasseqqinnissaq periarfissaareerpoq.
Qeqqani inuussutissarsiutigalugu piniartunut 2012 ilarsua ilanngullugu tuttunniarsinnaanngorput.
- Matumani nalunaaruteqarnikkut kissaatigivara pisassiissutinik sapinngisamik pitsaanerpaamik atuinissaq. Kommunit aqutsiveqarfiillu agguaasseqqinnikkut suliniutitigut suleqatigiinnissaat neriuutigaara, taamaasiornikkummi aalisartut piniartullu isertitaqarnerunissaat periarfissarsiuunneqarsinnaammat, Aalisarnermut, Piniarnermut Nunalerinermullu Naalakkersuisoq Ane Hansen kaammattuivoq.
