Pisassat tuniniarneqartut
Savalimmiuni pisassiissutigineqartartut nunatsinnisuulli kilisaataatilinnut akeqanngitsumik tunniunneqartarput, taamaaliortarnerli unitsinniarneqalerpoq paasineqarmat pisassiissutigineqartut 100 millionilikkaanik nalillit peqquserlunnikkut tunineqartartut.
Savalimmiuni aalisakkanik tuniniaanermut ilisimaarinnittut oqarput Savalimmiuni aalisariutaatillit pisassaminnik tunineqartartut sinniisulersorlutik nunani allani najugaqartunut kilisaataatiminnik tunisaqartartut taamaalillutillu pisassiissutigineqartut ilanngullugit tunisarlugit.
”Ingasattajaarnerungaarmat allaanngivippoq Ruslandimiiginnakasillartugut. Pisassiissutit akeqanngitsumik tunniunneqartartut 350 mio. koruunit pallillugit nalilerlugit tunineqartarput, inuillu ataasiakkaat pisoorsuannguutigisarlugit, isiginngitsuusaaginnaarsinnaanngilarput.” Høgni Hoydahl lagtingemi folketingimilu Republikanerit sinnerlugit ilaasortaasoq oqarpoq. Allannguuteqartoqartariaqarnera Lagtingimi amerlanerussuteqartunit, tassalu Folkeflokken-imit, Sambandspartiimit Socialdemokratiinillu taperserneqarpoq.
