Pisassat qaffattut akillu minnerpaaffilerneqartut

Aalisartut piniartullu kattuffiat KNAPK aamma Royal Greenland A/S qalerallit Uummannap aqutsiveqarfiani pisat pillugit akit minnerpaaffissaanik isumaqatigiipput. Isumaqatigiissut nutaaq ingerlaannaq atulersoq bonusisitsisarnermik aamma ilaqarpoq. Royal Greenland taama tusagassiutinut nalunaarpoq.
Allattoq Hagen Højer Christensen, Noah Mølgaard
novembarip 13-at 2012 14:26

Uummannap aqutsiveqarfiani qalerallit 3,5-mit oqimaannerit kilomut minnerpaamik 17 koruuneqalerput.

Qalerallit 3,5 kilo ataallugu oqimaassusillit kilomut minnerpaammik 11,50 koruuneqalerput.

Taassuma saniatigut Uummannap aqutsiveqarfiani KNAPK-mut ilaasortanut bonusisitsisarneq atulerpoq, taannalu atuutissaaq qalerallit tunineqartut siornatut 4.700 tons-it sinnerneqarsinnaappata. Bonusi aningaasatigut qanoq kinguneqassanersoq tusagassiutinut nalunaarummi eqqaaneqanngilaq.

Qaleralittassat 2013-mut aamma 2014-mut atuuttussat ullumi aamma aalisarnermut pisortaqarfimmit nalunaarutigineqarput. Tassani oqaatigineqarpoq 2013-mi Uummannap aqutsiveqarfiani qaleralittassat 1.000 tonsimik ilaneqassasut tassa 5.000 tonsiniit 6.000 tonsinut ilaneqassasut tamannalu ukiuni marlunni tulliuttuni atuutissaaq.

Ilanngullugu nalunaarutigineqarpoq Qeqertarsuup tunuani aamma Upernaviup aqutsiveqarfiani qaleralittassat allanngortinneqassanngitsut. Upernaviup aqutsiveqarfiani pisassat 6.300 tonsiussapput. Tassani ilisimatuussutsikkut inassuteqartoqanngilaq taamaammat misileraalluni aalisarnertut isigineqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq