Pisassat nungummata soraarsitsisoqartariaqassaaq

Ilulissani Halibut Greenlandip suliffissuani sulisut affaat nutaamik suliffissarsiortariaqassapput.
juulip 27-at 2012 07:05

Umiatsiaararsortut Qeqertarsuup tunuani qaleralittassaasa nungunnerat pissutigalugu aalisakkerisunik soraarsitsiortortoqarnissaa ilimanarluinnarpoq aqagumi umiatsiaararsortut qaleralinniarnerat ukiup sinneranut unissaaq.

Ilulissani Halibut Greenlandimi qalerallit tunisassiarineqartartut affaat umiatsiaararsortunit tulaanneqartarput umiatsiaararsortullu qaleralinniarnerat unippaat suliffissanik annaasaqartoqarsinnaasoq pisortaq Niels Thomsen ilimasaarivoq.

- Siunissaq ungasinnerulaartoq eqqarsaatigalugu ullumikkut sulisorineqartut affaannaat pisariaqartilersinnaavagut, tassalu inuit 30-it uani pineqarput, Niels Thomsen oqarpoq.

Suliffissuarmi sulisut 30-it saniatigut 235 Ilulissani umiatsiaararsortut 235-it allamik aningaasiorfissarsiortariaqassapput qaleralittassat aqagu nunguppata.

Taakkuinnaanngillalli, tassami umiatsiaararsortut Uummannami Upernavimmilu pisassaat aamma nungulerput.

Tamatuma kinguneranik umiatsiaararsortut 500-ut qaleralinniarnertik unitsittariaqassavaat.

Tamanna Qaasuitsup kommuniani ernumaammertitsisoq inuussutissarsiornermut suliffissaqartitsiniarnermullu ataatsimiititaliap siulittaasua Peter Olsen oqarpoq.

- Piareersimaffiginngivippata taama ilungersunartigisumik tusarlerneqarnissarput. Sulisartummi angerlartiinnarneqartariaqalerpata isumaginninnermut aningaasartuutit amerleriartussaapput, Peter Olsen oqarpoq.

Kommuunimit qanoq iliuuseqarnissaq maanna misissorneqarpoq taamaattoq Peter Olsen isumaqarpoq kommuuni tamatumunnga piareersimanerusariaqarsimagaluartoq.

Umiatsiaararsortut aalisarunnaarpata Royal Greenlandip tunisassiornermik Uummannami, Ilulissani Qasigiannguanilu unitsitsinissaq ilimaginngilaa.

Aalisakkeriviup Upernavik Seafoodip aamma suli nalileruminaatsippaa pisassat nungulernerat tunisassiorfinnut qanoq sunniuteqassanersoq.