Pisariaqarnerpaaginnaat kisimik katsorsarneqartarput

Nappaatillit katsorsarneqarnissaminnut utaqqisut amerliartuinnarput, Dronning Ingridillu Napparsimmavissuani nakorsaaneq oqarpoq pisariaqartinneqarnerpaaginnaat kisimik katsorsarneqartartut.

Nappaatillit katsorsarneqarnissaminnut utaqqisut amerliartuinnarput.

Sofie Lorentzen, Paamiuni najugalik ukiut arlallit illuttut seeqqumigut gigt-eteqareerluni suliaritinnissani maannakkut utaqqiinnarpaa. Qanoq sivisutigisumik utaqqisimanersoq Sofie Lorentzen aperaarput, akivorlu:

- Kingullermik misissortikkama oktobarimi misissortippunga, tullinguukkamalu utaqqiinnaqquneqarlunga. Utaqqerujuuginnarluni eqqarsarnartarpoq, sakkortuunillu anniarnaveersaatinik iisartagaqarama eqqarsarnartarpoq aqajarora qaqugu putussanersoq, Sofie Lorentzen oqarpoq, nangipporlu:

- Sulisarpunga, namminerlu ilikkarnikuuara qanoq ilillunga sulissanerlunga, anniarnaveersaarlunga. Nalulluinnarpara qanoq sivisutigisumik utaqqissanerlunga, namminerlu akissaqartuuguma suliaritikkusussagaluarpunga, Sofie Lorentzen oqarpoq.

Nappaatillit katsorsartinissaminnut utaqqisut qanoq iliuuseqarfigineqarnersut Dronning Ingridip napparsimavissuanut paasiniaratsigu, nakorsaaneq Birgitte Asmin Schurizek oqarpoq pisariaqarluinnartut kisiisa maannakkut katsorsarsinnaallugit, naatsorsuutiginerarluguli qaammatit pingasut qaangiuppata utaqqisut allat passussinnaalissallugit. Seeqquluttulli siffissamikkulluunniit innarluutillit ukioq sinnerlugu suli utaqqisariaqassasut naatsorsuutigaa.

Assigiinngitsutigulli aaqqiissutissanik pilersaaruteqarlutik oqarpoq, soorlu telemedicinimik taaneqartartoq, tassa nakorsamik najorneqanngikkaluarluni qarasaasiakkut attaveqaatit atorlugit misissortissinnaaneq oktobarip qaammataani aallartinneqassaaq, taassuma saniatigut sinerissami passunneqarsinnaaneq aqqutissarsiuunneqarpoq kiisalu nakorsat immikkut ilisimasallit sinerissami angalatinneqakulaarnerunissaat pilersaarutaavoq. Dronning Ingridip napparsimavissuata nutarterneqarlunilu allilernissaa maannakkut aamma aallartisarneqarpoq. Napparsimasullu toqqissisimannginnerat paasisinnaaneraa apeqqutigineqarmat nakorsaq akivoq, tamarmik passunneqassaqqaaramik toqqissisimannginnermik kinguneqartariaqanngitsoq, eqqaasitsissutigalugulu utaqqisinnaasut kisimik utaqqigallartariaqartut, passunneqartariaqavissullu tamarmik passunneqassaqqaartut, pissutsillu qaammatini arlalinni suli taamaakkallartariaqassasut. Ajornartorsiutit aaqqiivigineqapallannissaat kissaatigineqaraluartoq, peqqissaasussaaleqineq ajornartorsiutaasoq, allaammi Danmarkimi peqqissaasutut taartaasartussarsiorfiit amigaateqarmata. Taamaammat siunissaq eqqarsaatigalugu amerlanerusunik peqqissaasutut ilinniartinneqartarnissaat ajornartorsiutinut aaqqiissutaasinnaassaaq, nakorsaaneq Birgitte Asmin Schurizek oqarpoq.

Inuit 739-t katsorsarneqarnissaminnik utaqqisutut maannakkut allatsissimapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat