Pisamaniaritsi - kisianni nalunaarutiginissai eqqaamallugit!

Tuttoqarfiit ilaanni tuttut amerlavallaalersimapput, tuttulli amerliartortillugit pinngortitaleriffimmut nalunaarusiat nassiunneqartartut ikiliartorput. Biologillu sulinerinut tamanna akornutaasarpoq:

- Tuttut amerlassusaat pitsaasumik nakkutigineqassappata, piffinni assigiinngitsuni tuttut timimikkut peqqissussaat, qanoq innersut paasinissaat pisariaqarput. Tamakkuli paasissutissat immikkut immersugassat innuttaasunit immersorneqarneratigut aatsaat paasisinnaavagut, Josephine Nymand oqarpoq.

Taamaattumik piniartut pinngortitaleriffimmiit qinnuigineqarput tuttut suiaassusaat, utoqqaassusaat, tunnuisa issussusaat sumilu pisarineqarsimaneri nalunaarutigisaqqullugit:

- Pingaaruteqarpoq kingumut nalunaarnerit uagutsinnut apuuttarnissaat. Ajoraluartumimmi ukiuni qulini kingullerni kingumut qiviarutta, piniarnermut allagartallit eqqarsaatigalugit, taakku 20 procentiinnai nalunaaruteqartarsimapput. Taakkuli kisitsit pisartakkagut nalunaarsuinissatsinnut ikippallaarput, Pinngortitaleriffimmi Miluumasunut Timmissanullu Immikkoortortaqarfimmi Ilisimatooq, Josephine Nymand oqarpoq.

Piniartut pisaminnik nalunaarutiginnittartut ukiuni kingullerni qulini 80 procentimiit 20 procentiinnarmut apparsimapput.

Nalunaarusiaminnik tunniussisartut sooq taama ikitsiginersut pinngortitaleriffimminngaanniit eqqoriaannarneqarsinnaavoq:

- Siornatigut killilersuisoqarallarmat innuttaasut nalunaarsuutinik nassiussillaqqittarput. Maannakkut imaassinnaasoq innuttaasut isumaqartut pisariaqanngitsoq nalunaarsuutinik nassiussinissaq, taamaattumik immaqa puigortarpaat nassiussinissartik. Kisianni uumasut amerliartorneranni pisariaqarluinnarpoq nalunaarsuutinik nassiussinissaq, uumasut qanoq innersut paasisariaqaratsigit, Josephine Nymand uparuaavoq.

Nalunaarusiat illoqarfigisami kommunit allaffiannut tunniunneqartarput, taakkuli pinngortitaleriffimmut ingerlatitseqqittarput.