PIP: Meeqqanut inuusuttunullu aningaasaliissutissat amigarput
Meeqqat inuusuttullu sumiginnakkat ukiuni arlalinni amerliartuinnarneri erseqqissigaluttuinnarmata, Perorsaasut Ilinniarsimasut Kattuffiat PIP isumaqarpoq meeqqat inuusuttullu sumiginnakkat sullinnerat annertunerujussuusariaqartoq.
Aningaasat 5 millioni koruunit meeqqanut inuusuttunullu sumiginnakkanut suliniutinut
aningaasaliissutissatut innersuussutaasut PIP-mit ilusrisimaarneqarput, pingaartumik aningaasat atugassarititaasut ukiuni tulliini annikitsumik amerliartuaartinneqarumaartut Inatsisartut aappaagumut aningaasanut inatsissaanniimmat.
Taamaattorli meeqqat inuusuttuaqqallu ornittagaat namminersortunit ingerlanneqartut ullumikkut pingasuinnaapput, amerlanerusariaqaraluartullu
PIP-p siulittaasua Naussúnguaq Bisgaard tikkuaavoq.
Ilaqutariinnermut naalakkersuisoqarfiup meeqqat inuusuttullu sumiginnakkat pillugit suligasuartussat, januaari 2006-imi suliartik naammassillugu suliniutissanik siunnersuusiorsimanerat, ilaatigut sumiginnakkat ikiorserneqarnissaannut siunnersuisunik atorfinitsitsisoqassasoq, ilaqutariit siunnersorneqartarfiannik pilersitsisoqassasoq allallu siunnersuutigineqarput.
Tamakkuli tamarmik angujuminaassapput nunatsinni perorsaasutut ilinniarsimasut 200-t missaanniittut ullumikkut amigaataammata. Aningaasarsiat pitsaanerulerpata ilinniarfiit kajuminnarnerulissasut, Naussúnguaq Bisgaard oqarpoq.
