PIP: Kollegianik amigaateqarpugut

Ilinniartitsissussaaleqinerujussuaq meeqqerivinnilu perorsaasussaaleqinerujussuaq politikkerinit isummerfigineqanngippat, nunatsinni meeqqat inuusuttullu ajornartorsiornerat qaangerneqarnavianngilaq. Perorsaasut Ilinniarsimasut Peqatigiiffiata siulittaasua Nausúnguaq Bisgaard taama oqarpoq.

Ilinniartitsisut 450-it maannakkorpiaq amigaataasut, IMAK-imiit sapaatit akunneranni kingullermi oqatigineqarpoq. Nausúnguaq Bisgaard oqarpoq, perorsaasut 300 missaat amigaatigineqartut:

- Socialpædagogisk Seminarium Ilulissaniittoq ukiumut 22-iinnarnik tigusisarmat perorsaasunik amigaateqarnermut peqqutaaqataasinnaavoq. 100-t sinnerlugit ukiumut qinnuteqartartut ilisimavarput, taamaattoq 22-iinnarnik tigusisinnaavugut, kollegie-ssaaleqineq peqqutaatinneqarluni, kisianni peqqutipallaq taanna atorunnaarlugu perorsaasunngorniat 100-t missaanniittut inissaqartinneqassagaluarput, Nausúnguaq Bisgaard oqarpoq.

PIP-p siulittaasua Naasunnguaq Bisgaard Jens Thorin-imut taama oqarpoq. Perorsaasussaaleqineq Itisiliinermi nal. 19.555 toqqaannartumik aallakaatinneqarpat annerusumik sammineqassaaq, tassani meeqqat inuusuttullu atugaat pillugu nalunaarusiaq qulequtarineqassammat.