PIP: Isumaqatigiissut pingaaruteqaqaaq
Ilaatigut Namminersornerullutik Oqartussat tungaannit isumaqatigiinniarnerup ajalusoornera pissutigalugu, Perorsaasut Ilinniarsimasut Peqatigiiffiat, PIP, januaarip aallaqqaataa aallarnerfigalugu atorfinitsitsinernik unitsitsinialerpoq, tamanna Nunani avannarlerni perorsaasut Kalaallit Nunaanni suliffissarsiorsinnaajunnaarnerannik kinguneqassaaq.
- PIP-minngaanniit isumaqaratta PIP-p Namminersornerullutik Oqartussat kommuneqarfiillu isumaqatigiissutaat oqartussanit unioqqutinneqartuartoq suliffinnik atorfissarsiortussanik mattussiniarpugut, PIP-p siulittaasua Kaaliina Skifte oqarpoq, nangillunilu:
- Unioqqutitsinerit massakkut arlaqaleramik, aamma ukiut tamaasa unioqqutitsisaramik isumaqatigiissuterput tunngavigalugu. Isumaqatigiissuterput malinneqartussaavoq. Isumaqatigiissut inatsimmut tunngaviusutut pingaaruteqartigaaq, Kaaliina Skifte oqarpoq.