Nunatta perorsaasutut ilinniarsimasunik amigaateqarnerujussua pissutigalugu ulluunerani paaqqinnittarfiit artornartorsiorput.
Meeqqeriviup ”Puiaq”-p, Nuummiittup, saavani allaat allagartarsualiisoqarsimalluni ima allassimasumik:
”Meeqqerisunik ilinniarsimasunik amigaateqarpugut, pissarsiorluta”.
Nunatsinni perorsaasunik ilinniarsimasunik amigaateqarnerujussuaq qangalili ilisimaneqartoq, Perorsaasut ilinniarsimasut Peqatigiiffiata, PIP-p, siulittaasuata Kaaliina Skifte-p oqaatigaa:
- Perorsaasut 300-t missaanniittut amigaatigineqartut naluneqanngikkaluarpoq, annikitsuinnarmillu iliuuseqarfigineqarnikuugaluarluni, aatsaallu maannakkut iliuuseqarfiginiarneqarluni. Nukillalaarnartorujussuuvoq, assut, assorsuaq, Kaaliina Skifte oqarpoq, nangillunilu:
- Nunatsinni meerartavut iluamik perorluassappata pissutsit piviusut pillugit eqqartuisoqartariaqarpoq. Najugaq qimannagu perorsaasunngorniarfiit maanna atuuttut saniatigut Qaqortumi Tunumilu najugaq qimannagu atuarfinnik pilersitsisoqartariaqartoq PIP-mit oqaatigiuarsimavarput. Suliaminnut naleqquttumik allatuulli akissarsiaqarnissaat pingaaruteqarpoq. Perorsaasut allatuulli ilungersorlutik sulipput, PIP-mii siulittaasoq Kaaliina Skifte oqarpoq.
Najugaq qimannagu perorsaasunngorniat 18-it ukioq manna naammassipput. Tapisiat ilanngunnagit perorsaasut tunngaviusumik qaammammut akissarsiaat tassaapput 15.659 koruuniupput.
Perorsaasunik amigaateqarneq pillugu oqaaseqarusukkuit KNR-ip nittartagaatigut ilanngussisinnaavutit. Tassa www.knr.gl/nutaarsiassat iserfigalugit ilanngussisinnaagavit.
