Piorsarsimassutsikkut illorsuaq miliuunerpaalunnik tapiiffigineqarpoq

Odensemi Kalaallit Illuutaata tallimariaataanik anginerusumik Odensep umiarsualiani illuliortoqassaaq, taannalu taaguuteqassaaq Atlantikup Avannaani Piorsarsimassutsikkut Illorsuaq.
oktobarip 07-at 2008 09:00

Kalaallit, islandimiut savalimmiormiullu Illorsuarmi katersuuttassapput, kommunillu illumut aningaasaleeqataanissaanut 20 millioni koruunit Odensemi pisortat qinikkat qulakkeeqqammerpaat.

Aningaasat suli atorneqarsinnaanngillat, agguagassatut pituttoqqagallarlutik, aningaasaliisussanillu pissarsisoqarpat aatsaat atorneqarsinnaanngussapput, aviisimi Fyens Stifttidendemi taama allaaserinnittoqarpoq.

Kalaallit Illuutaanni Hunderupip Aqqusernganiittumiittut umiarsualivimmi illorsuartaarnissartik qilanaarilereerpaat.

-Maani inissakillioraluttuinnarpugut. Ima susassaqartitsitigaagut, illu mikivallaalersimalluni. Illutaassarput soorunami umiarsualivimmiissaaq. Nunanimi Atlantikup avannarpasissuani inuit immamut naleqquttumik inuuneqarput, Kalaallit Illuutaanni pisortaagallartoq, Annette Lyberth oqarpoq.

Ilinniartut ineqarfii, ataatsimiittarfiit, init eqqumiitsulianik kusanartulianillu saqqummersitsiviit, pisiniarfiit atortussanik kusanartulianik nioqqutillit, takornarnianut allaffik neriniartarfillu kalaaliminernik, aamma islandimiut savalimmiormiullu nerisassaataannik pisiffiusinaasoq illumiissasut takorloorneqarpoq. Piorsarsimassutsikkut illorsuassaq 4000 kvadratmeterit missaannik angissuseqassaaq.