Pinochet toqummat nuannattut

Kisermaassilluni naalakkersuisuusimasup Augusto Pinochetsip toqunera ippassaq nutaarsiassatut saqqummiunneqarmat chile-miut 1000-likkaat Chilep illoqarfiisa pingaarnersaanni Santiago-mi aqqusinermi nuannattorsuanngorsimapput.

Inuppassuit champagne-mik skåleerrallutillu aqqusinermi qittassimaqaat, nuannannersuarli innuttaasut politiillu akornanni ilaatigut aporaannertaqarsimasoq oqaluttuarineqarportaaq.

Kisermaassilluni naalakkersuisuusimasup 1973-imili Chile-mi pissaaneq tiguaa. USA-llu sakkutuui akuliutsinneqarput taamalu ukiorpassuarni præsidentitut siuttuusimasoq Salvador (Aliandi) Allende uppitinneqarluni.

Taassuma ukiuni 17-ini tassa 1990-ip tungaanut siuttuunerata nalaani inuit 3.000-init amerlanerusut toqutaanngikkaangamik periarfeerullutik tammaaneqartarsimapput.

Pinochet 91-inik ukiulik toqungajalernerata nalaani inuit pisinnaatitaaffiinik unioqqutitsisimasutut peqquserlussimasutullu unnerluutigineqarpoq. Timimigulli peqqinnginnera pissutaalluni eqqartuunneqanngitsoorpoq.

Pinochet innuttaaqataasutut ilineqassanngilaq, aalajangerneqarporlu ileqqoq malillugu ulluni arlalinni aliasuutigineqassanngitsoq. Pinochet aqagu sakkutuutut ilisaassaaq.