Pinngussat navianartunik akoorutissartallit paasineqartut

Danmarkimi avatangiisinut aqutsisoqarfiup, Miljøstyrelsip, pinngussat assigiinngitsut marluk LAMACE-mik ilisarnaatillit pisiniarfinniit peeqquai. Pinngussat taakku akoorutissanik kræfteqalissutaasinnaasunik tartunullu akornusiisinnaasunik (phtalaatinik) akullit niuertarfinni pinnguaarniarfinnilu tuniniarneqarput.

Nuummi Butik Nuunu pinngussanik pineqartunik tuniniagaqarpoq. Piginnittoq Mette Thorndahl oqarpoq pinngussat pineqartut piaarnerpaamik peerneqartut.

- Paasigakku pinngussat taaneqartut pisiniarfiutinnit tuniniagaralugit, ingerlaannaq ilisivimmit peerpakka, oqarpoq.

Pinngussat pineqartut ilaat tunereersimavai, taakkunanngalu pisisimasut kaammattorpai pisiaminnik akiliutiminnillu utertitsiartoqqullugit.

Mette Thorndahl niuertarfiutilittut ajornartorsiutinik taamaattunik naammattugaqarnini iluamik iliuuseqarfigisinnaannginnerarpaa, oqarluni allatut ajornartumik Danmarkimi pinngussanik sanaartortoq tatiginiartariaqarlugu, aamma tatigeqqummata. Pinngussat sanaartukkatik ajoquteqannginnerarpaat, uannullu tunineqarput, ajoquteqannginnissaallu naatsorsuutigaara, Mette Thorndahl oqarpoq.

Atuisartut siunnersuisoqatigiiffianni siunnersorti Ane Marie Geråe taamatut pisoqartillugu Atuisartut Siunnersuisoqatigiiffiannit qanoq iliortoqarsinnaanersoq paasiniaaffigaarput.

- Pinngussat meeqqanut ulorianarsinnaammata avatangiisinut aqutsisoqarfimmit paasineqarmat nioqqutissat piiarneqarsimapput, utertitsiortuisoqarsimallunilu. Maanngaanniit kaammattuutigerusupparput pinngussanik pineqartunik pisisimasut pisiaminnik utertitsiartoqqullugit,

Atuisartut Siunnersuisoqatigiiffianni siunnersorti Ane Marie Geråe oqarpoq.