Pinnguartarfiit pinerlunniarnerup akiornerani sakkuginiarpaat
Illoqarfimmi sumiiffinni assigiinngitsuni pinnguartarfiit pingasut sananeqassapput.
Suliniut inuusuttut klubbiat, kommunip teknikkikkut immikkortoqarfia, sunngiffimmi susassaqartitsinermi pisortap suliffissarsiuussisarfiullu suleqatigiinnerisigut piviusunngorpoq.
Inuusuttut sisamat suliffissarsiortullu marluk pinnguartarfilioqataassasut, pitsaaliuinermi siunnersorti Maasinnguaq Berthelsen tusagasiutinut allalluni oqaluttuarpoq.
Pinnguartarfiit taakkua pingasut sapaatit akunnerata tulliani sananeqaleriissapput. Meeqqanullu mikinerpaanut pinnguartarfissaq, timersortarfiup avannaa tungaaniittussaq, siulliullugu sananeqassaaq. Tamaani qullernut napparutikorsuit atorlugit nivinngaartarfiliussapput.
Aamma pinnguartarfiliortoqassaaq eqaarsaarnermik atortulimmik, soorluttaaq meeqqanut mikinernut arsaattarfeqalissasoq.
Atortussat pisariaqartut illoqarfimmi pigineqareerput, tamannalu sipaarutaassasoq tusagassiutinut allakkami eqqaaneqarpoq.