Pinnguaatigaluni ilinniarneq
Pinnguaateq ‘Aallaaniarneq’ tallimanngormat Katuami saqqummiunneqarpoq. Pinnguaammi pinnguartut piniarniarlutik aallaaniarfimmiit aallaaniarfimmut angalasassapput. Pinnguaatip pinnguarinerani ulorianartut assigiinngitsut siumorneqartassapput, aatsaallu unammillernartut tamakku aqqusaareeraanni pinnguaat naammassineqarluni ajugaasoqarsinnaasassaaq. Attaveqarnermut Angallannermullu Naalakkersuisoq Jens B. Frederiksenip pinnguaat saqqummiunneqarnerani oqalugiartuuvoq.
-Siornatigut imarsiornerup isumannaatsuunissaanut suliniutit innuttaasut inersimasortaannut sammitinneqartarput. Taamaattumik pinnguaat nutaaliorneruvoq, meeqqanut siunissami angalasartussanut saaffiginnittoq. Pinnguaat aqqutigalugu isumannaallisaanermut atortut ajutoortoqartillugu pitsaasunik inerneqartitsinissaannut periarfissat annertusitinneqassapput. Aallaqqaataaniilli pitsaasunik ileqqoqarnissap ineriartortinneqarnissaata pingaaruteqarnera pineqarpoq, taama Jens B. Frederiksen naqissusiivoq.
Pinnguaatip piviusorpalaartinnissaa anguniarlugu pladip pinnguarnermi atorneqartussap nunatsinni kangerlunnut assingutillugu suliarineqarsimavoq, atuartut angalaaraangamik takusartagaannut assingutillugu. Taamaaliornikkut atuartunit nuannarineqarluni pinnguarineqarnerulernissaa anguniarneqarluni. Pinnguaatip siunissami atorneqarluarnissaa anguneqassappat aamma ilinniartitsisut atuartitsinerminni pinnguaatsip atortarnissaa pisariaqarpoq. Pinnguaatip pilersinneqarnissaanut aningaasaliisuupput KNI, Royal Arctic Line aamma Shell.
-Pingaaruteqartorujussuuvoq isumannaatsumik imarsionissamut ilisimasat qaffassarneqarnissaat, tamannalu projektip tapersersorumasimaneranut pissutaasut pingaarnerpaat ilaat. Pissutaasoq alla aamma tassaavoq atuartut imarsiornermut tunngasumik ilinniagaqalernissaanut soqutiginnilersikkusukkatsigit. Projektip aallartinneraniilli taamaattumik peqataasimavugut, suliallu inernerisaa pikkorissumik suliarineqarsimasoq assut naammagisimaarparput, Royal Arctic Line-imi attaveqarnermut pisortaq Jakob Strøm knr.gl-imut oqarpoq.
Pinnguaat aamma Shell-imit aningaasaliiffigineqarpoq.Imarsionerup isumaatsuunissaanut suliniuteqarneq uuliasioqatigiit aningaasaliisimanerminut pissutitut taavaat.
-Shell-imit isumannaallisaaneq salliutittuaannarparput. Nunarsuarmi isiginiartagatta ilagaat isumannaatsumik angalanissaq, taamaattumik pinnguaatissamut isumassarsiaq saqqummiunneqarmat ajasuunngitsuunngilagut. Isumaq assut quianarpoq pitsammik ilikkagaqarfiulluartumik qanoq isumannaannerusumik imarsiortoqarsinnaanersoq erseqqissaasuulluni, Shell-imeersoq Trine Jensen nassuiaavoq.
