Pinngortitaq illersorusuppaat

Pinngortitamik avatangiisinillu illersuiniaqatigiiffimmik nutaamik nunatsinni pilersitsisoqaqqilerpoq. Tamatumuuna biologit pisassiissutitut siunnersuutaasa tusaaniarneqartannginnerat akerlilerniarlugu illersuiniaqatigiiffimmik pilersitsisoqalerpoq.

Pilersitsiniaqataasoq Jesper Labansen ima oqarpoq:

- Isumaqarpugut peqatigiiffimmik kalaallit eqqarsariaasaannut qaninnerusumik pilersitsisariaqarluta. Nunarsuarmi pinngortitamik avatangiisinillu illersuiniaqatigiiffiit illuinnaasiorlutik illersuiniartarput, uagulli nammineq nunatsinnik ilisimannilluarluta illersuiniaqatigiiffiliorutta paasineqarsinnaanerunissarput anguniarparput, Jesper Labansen oqarpoq nangillunilu:

- Imaanngilaq nunatsinni uumasunik pinngortitamillu atuinitta isornartorsiuinnarnissaa anguniaripput, kisianni aamma soorlu pisassiissutinik biologit siunnersuuteqartarnerisa tusaaniarneqarpallaartannginnerat oqallisigineqartartussatut siunniupparput, Jesper Labansen oqarpoq.

Illersuiniaqatigiiffimmik nutaamik pilersitsiniarnermi siunertarineqarpoq, avatangiisip pinngortitallu illersorneqarnissaa aammalu pilersaarusiorluagaasumik illersuinissap anguniarneqarnissaa.

Pinngortitamik avatangiisimillu illersuiniaqatigiiffiup suliniutigisassaata aamma ilagissavaa innuttaasut pinngortitamut angalaarsinnaanerisa killeqanngittuarnissaa aammalu pinngortitap paarilluarneqarnissaanik paasisitsiniaajuarnissaq.

Maannakkut suliniaqatigiiffiup taaguutigigallarpaa Nattoralik, peqatigiiffiliornissarlu aallartinniarneqassaaq apriilip 26-ani arfinepingasut qeqqanut, nuummi atuarfiit ilaanni ASK-imi. Peqatigiiffimmik aallarniiniarnermi malittarisassat internet-mi nittartakkatigut uunga isernikkut takuneqarsinnaapput: WWW nuna naggat gl titarneq uingasoq nattoralik.