Pinngortitamut tunngasunik suliaqartut suleqatigiinnerulissasut

Pikkorissaaneq Aarhusip Universitetiani DTU Aquamilu ilisimatuunit aqutsisuuffigineqarpoq, "aqutseriaaserlu naleqqussarneqarsinnaasoq" pillugu pikkorissartunut saqqummiisoqarpoq. 

Aqutseriaatsimi naleqqusarneqarsinnaasumi pinngortitami aqutsinermik suliaqartut, soorlu ilisimatuut, aalisartut, piniartut oqartussaasullu ingerlatsinissamut pilersaarummi anguniagassat peqatigiillutik isumaqatigiissutigisarpaat. 

Illuatungeriillu pilersaarut aqqutigalugu suna anguniarneqassanersoq isumaqatigiissutigereerpassuk suliarineqartarpoq piviusunngortinneqarlunilu. 

Tamatuma kingorna nakkutilliinermik, ingerlaavartumik nalilersuinermik naleqqussaanermillu malitseqartinneqassaaq. Taamaaliornikkut aqutsisut, atuisut uumassu-si-linnillu ilisimatuut uumasoqatigiiaanik ataasiakkaanik aqutsineq peqatigiillutik nalilersuiffigissavaat.

Aqutseriaatsimik naleqqusarneqarsinnaasumik taaneqartoq pikkorissartunit sammineqarpoq, assersuutissanillu nunatsinneersunik aallaaveqarlutik sulisinneqartarlutillu oqallitsinneqarput. Assersuutigalugu piffissami kingullermi oqallisaaqisunut Nunatta sineriaata avataani saarullinnut appanullu tunngatillugu aqutseriaatsimik taama ittumik pisariaqartitsisoqaraluarnera sammineqarpoq. 

 - Aqutseriaaseq matumani pineqartoq iluarinartuuvoq, attuumassuteqartummi akornanni tatigeqatigiinnermik pilersitsilluartarmat, Jesper Madsen, Aarhusip Universitetianeersoq Pinngortitaleriffimmilu ulluni pingasuni pikkorissaanermi aqutsisuusoq, taama oqaluttuarpoq.