Pinngortitamik Ilisimatusarfiliornissaq siunnersuutigineqarpoq
- Kalaallit ujarassiuut uuliasiuullu ikitsuararsuupput, taamaattumik GSG-mi sulisussat amerlanersaat allatut ajornartumik tikisinneqartussaassapput. Taamaattumik kalaallit maani ilinniarsinnaanerat ilisimatusarfimmik pilersitsoqarnissaa orniginartippara.
Naalakkersuisut Danmarkimi Kalaallit Nunaannilu ujarassiuutut misissuiffiup GEUS-ip suliai tigorusuppai, tassungalu taarsiullugu GSG pilersikkusullugu. Aatsitassat uuliallu pillugit paasissutissat nunatsinni katersorneqartut nunatsinnit pigineqalernissaat taamaaliornikkut siunertarineqarpoq.
GSG pilersinneqarpat ilisimatuussutsikkut allaffissornikkullu suliallit katillugit 40-t sulisorineqassapput ukiumullu ingerlatsinermut suliniutinullu aningaasaliissutaasartut katillugit 51,5 million koruuniusassallutik. Taakku saniatigut allaffeqarfiliornermut atortulersornissaanullu immikkut aningaasaliisoqassaaq.
GSG-milli pilersitsiniarnermut suliniutit qasukkalaarlugit kalaallillu ujarassiuut sulisussarsiarineqarsinnaasut amerlanerusut pissarsiariniarlugit Ilimmarfimmi Pinngortitamik Ilisimatusarfimmik pilersitsisoqartariaqaraluartoq Nunaoilip pisortaa Hans Kristian Olsen isumaqarpoq.
Aamma isumaqarpoq Ilimmarfimmi Pinngortitamik Ilisimatusarfeqalertuuppat nunani allani ilisimatusarfinni ilisimatuunik, ilinniartitsisunik ilinniartunillu suleqatissarpassuaqassasoq, misilittakkat takutereermassuk nunatta qaarsoqarfia immikkuullarissoq misissussallugulu ilisimartusarfigissallugu soqutigineqarluartoq.
- Paasissutissanik katersuineq siammartiterinerlu nammineerluta aqussinnaasariaqarparput, soorlu aamma aatsitassarsiorneq nunatsinni akisussaaffigigatsigu aqutaralugulu, Hans Kristian tunngavilersuivoq.
GEUS-ip Namminersorlutik Oqartussallu akornanni isumaqatigiissut ukiup naanerani atorunnaassaaq, Aatsitassaqarnermut Naalakkersuisoq Jens-Erik Kirkegaard siusinnerusukkut oqareerpoq isumaqatigiissutip sivitsorneqarnissaa naatsorsuutigalugu.
