Pinngortitaleriffiup siunnersuutini allanngortikkusunngilaa
Aalisarnermut Piniarnermullu Naalakkersuisoq Pinngortitaleriffimmik ataatsimeeqateqarmat, pinngortitaleriffiup aalajangiusimavaa, qilalugartassatut pisassiissutissatut siunnersuutaareersut allanngortinneqannginnissaat. Pinngortitaleriffimmi tusagassiisartoq Emma Kristensen ima oqarpoq:
- Kingullermik NAMCO-minngaanniit JCMP-minngaanniillu siunnersuisoqarmat, qilalukkanik qernertanik tunngatillugu ukiumut 135-it sinnertariaqanngikkaluaraat siunnersuutigineqarpoq. Qilalukkat qaqortat pillugir ukiumut 100-t sinnernagit pisarieqartarnissaat siunnersuutigineqarluni, Emma Kristensen oqarpoq nangillunilu:
- Piniartut biologillu assigiinngissutaat oqaatigiuminaappoq, piniartummi maannakkut oqalupput qilalukkat amerlaqisut, kisianni uagut soorunami ilaannginnatta naluarput piniartut amerlasuujuneragaat qanoq amerlatiginersut. Aamma naluarput qanoq amerlanerulersimatiginersut. Amerlaneruneraanerat siornamut imaluunniit ukiorpassuit matuma siornamut naleqqiussinerua? Nalunngilarput qilalukkat qaqortat qernertallu pisarineqartartut ukiuni kingullerni arlaqalersuni ikiliartuinnarsimasut, assersuutigalugu 1990-miit qilalukkat qernertat ukiumut 1000-it, pisarineqarput taassumali kingorna pisaasartut ikiliartuinnavissimallutik, Emma Kristensen oqarpoq.
- Qilalukkanik pisassiinermi 135-nik siunnersuuteqarneq pissuteqarpoq qilalugaqatigiit siumut aallarnissaanut periarfissaq 70 procentiisussaagaluarmat, qilalugartassat 135-nik sinnerneqanngikkaluarpata. Assersuutigalugu qilalukkat 100-t isigisutsigut sisamaannaat pisarineqassapput, aatsaat taamaaliortoqarpat qilalugaqassuseq pitsaanerujartulissaaq.
Aalisarnermut Pisortaqarfimmi pisortaq Amalie Jessen oqarpoq, Pinngortitaleriffimmik oqaloqateqarsimaneq aallaavigalugu sulisoqartoq, qanorli pisoqassanersoq aatsaat aqagu oqaaseqarfigisinnaassagitsik.
