Pinngortitaleriffiup atuagaatai Ilisimatusarfimmut

Ilisimatusarfiup atuagaateqarfiata Pinngortitaleriffiup atuagaatai pisartagaalu tiguvai, siunissamilu suliffeqarfiit allat peqatigalugit qarasaasiatigut ujarliutinik pisartagaqalernissaq anguniagaavoq. Taamaasilluni nunatsinni ilisimatusaatit pillugit atuagaateqarfeqalernissamut allorneq siulleq tiguneqarnikuusutut oqaatigineqarsinnaavoq.

Nunatsinni ilisimatuussutsikkut suliat qitiusumik atuagaateqarfeqalernissaannut immaqa alloriarneq siulleq tiguneqareersutut oqaatigineqarsinnaavoq. Ilisimatusarfiup atuakkanik atorniartarfiani atuagaatilerisoq Bolethe Olsen ima oqarpoq:

-Ilisimatusarfiup atuagaateqarfianut pinngortitaleriffiup atuagaaatuagaatai nutserput maani atuagaateqarfimmiilerlutik.

Atuagaateqarfiulllu atuakkat tiguinnarnagit aamma ukioq naallugu qarasaasiatigut ujarliutit databaset atorneqartartut tiguaat, taamaasillunilu Ilisimatusarfiup atuisuinit atorluarneqarlutillu aamma ujarlerfigineqarsinnaanngussallutik.

Tamannalu pitsaasuuvoq, tassami Ilisimatusarfiup atuagaateqarfiani qarasaasiakkut ujarlerfik ataaseq atorneqartartoq ukiumut 43.000 kronenik akeqarpoq. Ujarlerfiillu taamaattut atuinermut akiliuteqartartut pisariaqartinneqaraluttuinnarput. Ilisimatusartuniinnaanngitsoq:

- Pisortat suliffeqarfii maani, maaniittut kissaataat aamma annertusiartornikuuvoq arlaatigut paasissutissanik nunarsuarmi allaaserineqartunik ilisimatusartunik allanillu tamakkuninnga imalinnik suliaminnut tunngasunik ujarlerfigisinnaasaminnik aamma ujartuillutik aallartinnikuupput, Bolethe Olsen oqarpoq.

Taamaasilluni soorlu Katersugaasivimmiut Aatsitassanillu pisortaqarfimmiut siunissami Ilisimatusarfimmi atuagaateqarfik peqatigalugu suleqatigiissutigisaminnik ujarliutinik peqalernissartik ilisimatusartunit tamanit atorluarneqarsinnaasunik anguniaraat paasinarpoq.

Suliffeqarfiit arlallit atuagaataasa ilisimatusarfiit atuagaateqarfiinut katersorneqarnerat takornartaanngilaq, siorna Danmarkimi issittoq pillugu ilisimatusarnermut tunngasut sipaarutaangajalluinnarnerisa kingunerannik suliffeqarfiit arlallit atuagaataat Polar Bibliotekimut Københavnip universitetianiittumut katersorneqarmata, massakkut atuakkat ataasiakkaaginnarlugit pigilernissaat anguniarlugu atuakkanik piiaasoqaleruttortoq atuagaatilerisoq Vibeke Sloth Jokobsen oqarpoq.