Pinngortitaleriffimmi proffessori siulleq
Pinngortitaleriffik oqaluttuarisaanermi siullerpaamik proffessorimik atorfinitsitsilerpoq, atorfinittussaq Søren Rysgaard ilisimatusarnermik suliaqarpoq.
Søren Rysgaardip pingaarnertut suliassaraa Pinngortitaleriffiup ilisimatusaatitut ingerlanniagaa EcoGreen-ip inerisaaqataaffigissallugu. Tassani Kalaallit Nunaata kitaata imartaani silaannaap, uumassuseqassutsip inuillumi imminnut ataqatigiinnerannut tunngassuteqartut misissussavai.
Aamma nunatta kitaata imartaa sammisaanut ilaalissaaq.
Proffessorip imaani uumassuseqarneq immamilu ataqatigiissuseqarneq immikkut ilisimatusarfigisimavai tunullu avannaani nunarsuarmioqatigiit ilisimatusaqatigiittarneranni peqataasarsimavoq.
Qularutigineqanngilarlu Søren Rysgaard sulianik aallartitsilluartarnermigut ilisimaneqartup Pinngortitaleriffimmi iluaqutigineqarluassasoq.
Proffessoritut atorfininniarlutik qinnuteqartut arfinillit akornanni Søren Rysgaard aalajangersaasartunit toqqarneqarpoq, aasarulu ilaquttanilu Nuummut nuussapput.
