Pinngortitaleriffimmi ilisimatuut umiarsuartaalerput

Umiarsuaq aalisakkanik misissuinermi atorneqarnerussaaq, avataanili uuliamik ujaasinermut aamma nunami sinerissamut qanittumi aatsitassarsiortoqarnialersillugu umiarsuaq aamma atorneqartassasoq oqaatigineqarluni, tassami umiarsuit nunatsinni angallattartut amerliartuinnarput imaanullu pinngitsooratik sunniuteqartussaallutik.

Imaani avatangiisinut tunngassutilinnut suliassat upalungaarsimanissarlu Nunatsinni siunissami pisariaqarnerulertussaapput, taamaammat ilisimatuut umiarsuaat inuiaqatigiinnut aningaasaliinertut isigineqartariaqarpoq, avatangiisinullu mianerinninnerput tamanut takutissallugu, Pinngortitaleriffik tusagassiuutinut nalunaarummini taama allappoq.

Umiarsuaq imaani misissuinermi atorneqartussaq 32 meterinik takissuseqarpoq, Skagenimilu Karstensens Skibsværftimi sananeqarluni, sumiissusersiutinillu attaveqaatinillu nutaaliaanerpaanik atortorissaarusersugaalluni. Issittummi imartaani qaammataasatigut attaveqarsinnaanermut killeqaqisumi atortorissaarutai atorsinnaalluartussaassapput.

Umiarsuup iluani misissueqqissaartarfiit laboratoriat arlaqarput inunnullu 16-inut inissaqarpoq, tassa inuttanut arfinilinnut biologinullu qulinut inissaqassalluni.

Umiarsuaq Nuummi apriilip 14-ianni nalunaaqutaq 14.00 pisortatigoortumik  atserneqassasoq, Pinngortitaleriffiup nalunaarutigaa.