Pinngortitaleriffimmi ilisimatuut aalisariarput
Biologit - tassa uumassusilerituut - aalisakkanik qalerualinnillu Tunumi sinerissami assigiinngitsuni 100-ni sapaatip-akunnerini tulliuttuni marlunni pingasunilu aalisarnialerput. Nunap Isuaniit allorniusat 66-ississaannut aalisagaqassutsimik kinguppaqassutsimillu misissuinissaq siunertarineqarpoq.
Allattoq Elisa Isaksen
aggustip 03-at 2011 09:32
Ilisimatuut umiarsuaq Pâmiut atorlugu Qaqortumiit arfininngormat aallarput. Aqqutaani internetikkut ingerlaavartumik allattassapput, ilaatigullu tassani Nunap Isua uiarlugu aqqutaa ajornartorsiortitsisimanersoq atuarneqarsinnaavoq. Kassorpassuit pujorlu ussissoq pissutigalugit Pâmiut sangujoraaqaluni arriitsunnguamik ingerlaartariaqarsimavoq.
Aalisakkat qalorsuarnik aalisarneqarput aalisarfiillu siulliit suluppaakkanik saarullinnillu pissarsiviungaatsiarsimasut ilisimatuut ilisimatitsissutigaat, taakku aalisakkat ipiutaasartaanik misiligutissanik tigusisarlutillu aalisakkat angissusaannik uuttortaasarput.
