Pinngortitaleriffimmi atorfinittoq

Arnaq amerikamioq biologi Pinngortitaleriffimmiit sulilluni arfernik ilisimatusarnialerpoq.

Ilisimatusarniartoq tassaavoq Kristin Laidre, USA-mi nunap immikkoortuanit Washingtonimeersoq, illoqarfik Seattle-imiit.

Kristin Laidre Kalaallit Nunaata imartaani silaannaap allanngoriartornerata uumasoqassutsimut sikumullu sunniutai itinerusumik misissorniarpai.

Ph.D.-nngorniarluni, tassa doktorinngorniarluni Kristin Laidre-p qilalukkat pillugit siorna ilisimatuutut allaatigisaqarpoq.

Sikusarnerup nerisassaqassutsimut attuumassuseqarnersoq, kiisalu qilalukkat ingerlaartarfii suunersut paasiniarlugit, biologip Kristin Laidre-p, suleqatigaa ilisimatooq, Mads Peter Heide-Jørgensen, Pinngortitaleriffimmeersoq.

Ilisimatusarneq taanna annertusarniarneqarpoq, arferillu allat aamma misissuiffigineqarniarlutik. Qilalukkat qernertat, arfiviit timmissallu misissuinermi ilaatinniarneqarput.

USA-mi National Science Foundation-ip aningaasaliineratigut misissuisinnaasoqalersimavoq.