Pinngortitaleriffik: Tuttunik kisitsinerput eqqortumik ingerlavoq

Biologit tuttunniarnermut atatillugu siunnersuisimanerannik eqqunngitsumik illuinnaasiortumillu ippassaq ulloqeqqanut radioavisimi tusagassiaq Pinngortitaleriffimmit erseqqissaavigineqarpoq. Pinngortitaleriffiup tusagassiisartua Emma Kristensen oqarpoq, Nikolaj Heinrichip kisitsisit taakkartugai Pinngortitaleriffiup pilersinneqarnera sioqqullugu ingerlanneqarnikuusut erseqqissaatiginiaritsik, taamaattumillu taakku oqaaseqarfiginissaat imminnut killeqartoq, Pinngortitaleriffik 1995-imi aatsaat pilersinneqarmat eqqaasitsissutigaa, tuttulerisumillu 1996-imi aatsaat atorfinittoqarluni. Kisitsinermut periutsit taamanerninngaaniit inerisarneqaqqillutillu pitsanngorsarneqarsimasut, Emma Kristensen oqarpoq.

Emma Kristensen aamma oqarpoq taakkua oqaatigisani maanna siunnersuisarnernut tunngaviusut. Erseqqissarpaalu KNAPK-p siulittaasua, Peter Olsen aamma ippassaq paasiuminaatsuliortoq oqarami biologit anguniarumasaminnik tunngaveqarlutik siunnersuisartut.

Peter Olsenip taama oqarnera nammineq paasiuminaatsinnerarpaa, tassami Pinngortitaleriffik anguniagaqassalluni pisinnaatitaanngimmat, kisianni ilisimatusarnermut tunngaveqartumik misissuinernik ingerlatsereerunik soqutigisanik arlaannaannullunniit attuumassuteqanngitsunik siunnersuisussaatitaammata.

Emma Kristensen aamma oqarpoq biologit piniartullu suleqatigiinnerat maanna amerlanerpassuartigut ingerlalluartoq, kisianni soorunami isumaqatigiinnginnerit pisaraluartut.