Pinngortitaleriffik tunumi aalisagaqassutsimik misissuivoq
Tamatuma saniatigut ilaatigut qalerallit nalunaaqutsersorneqassapput.
'Pâmiut' aallarniutigalugu Ikerasassuup kujatinnguani misileraalluni aalisaqqaassaaq, matumani immami ikkattumi, tassa 50 meterit 600 meterillu akornanni qanoq saarulleqartiginera raajaqassuserlu nalunaarsorneqassallutik, kiisalu immami itinerusumi, tassa 400 meterinit 1500 meterinut itissusilimmi qaleraleqassuseq.
Angallat ukiormanna siusinnerusukkut raajaqassusermik kitaani misissuereerpoq. Pinngortitaleriffiup ukioq manna naappat, sinerissap avataani misileraalluni aalisarnerit arfineq-marluk kiisalu Upernavimmiit Nunap Isua uiarlugu Tasiilap avannaanut sumiiffinni assigiinngitsuni 500-t sinneqartuni, aalisakkanik misissuinerit ingerlassimassavai.
Pinngortitaleriffimmeersup uumasunik ilisimatuup Kaj Sünksenip misileraalluni aalisarnermi pisortaasup angalanertik, sapaatit akunnerinik pingasunik sivisussuseqartussap, Pinngortitaleriffiup nittartagaatigut ingerlaavartumik oqaluttuarisassavaa. Misileraalluni angalaneq nittartakkakkut www.natur.gl -imi malinaaffigineqarsinnaavoq.
