Nuummi Pinngortitaleriffik (toqqorsivimmit assi).

Pinngortitaleriffik Nuummi aarluit pillugit: Ulorianartorsiortitsinngillat

Nuup Kangerluani aarloqartarnera tupinnartuunngilaq, taakkuami ukiut tamaasa nunatta kitaanukartarput, piniartullu piniagaannik puisinik arfernillu ulorianarsiortitsinngillat, Pinngortitalerifimmi miluumasut pillugit immikkoortortami pisortaq Fernando Ugarte oqarpoq.

Nuup Kangerluani qaqutigut takuneqartartut sapaatit akunnerani kingullermi siumorneqartut tassaapput aarluit sisamat.

Takuneqaqqaarnerinik ullut ikittut qaanngiumata piniartunik siumorneqarput sapaatillu akunerata siuliani sisamamngornermi tamarmik pisarineqarput sisamallu kivillutik.

Taama oqaluttuarpoq piniartut ilaat Karl-Anders Skifte KNR-imi apersorneqarluni. Taassuma oqarnera naapertorlugu aarloqartillugu tamanna piniakkaminnut ajoqutaasut. Pinngortitaleriffimiillu allatut isumaqarput.

AAMMA ATUARUK Piniartoq aarlummik perngartoq: Mamaq aqik

Pinngortitalerifimmi miluumasut pillugit immikkoortortami pisorta Fernando Ugartep piniartut piniagaanik aarluit ulorianartorsiortitsinngitsut nalilerpaa. Aarluimmi Kalaallit Nunaata kitaani tamarmi takuneqartarmata.

- Aarluit kangerlummiinneranni puisit arferillu qimaatittarpaat, taakkuali uteqqittarput aarluit qimagukkaangata Fernando Ugarte oqarpoq.

Aarluk kiilumut 50 koruuni

Piniarnermut Aalisarnermullu pisortaqarfimmut aarluit pisarineqartut nalunaarutigineqartut naapertorlugit, 2012-mi aarluit 44-it pisarineqarput taakkunannga 17-it Uummannami.

Nuup Kangerluani aarlummik pisaqartoqarmat kalaallit nerisassaataannik tunisassiortup Wildfood. Gl-ip piniartut aarluup mattaanik neqaanilu kiilumut 50 kr-nilerlugu tunisisinnaaneranik neqeroorfigai.

Aarluit neqqaat mattaalu kviksølvimik avatangiisinilu toqunartumik PCB-mik annertuumik mingutsinneqarsimammata nerinissaat ulorianarsinaammata, Fernando Ugartip ilanngullugu oqaatigaa.

Tamanna tunumi aarluit misissuiffigineqarneranni takuneqarsinnaavoq tassani aarluit nerisasssatut uumasunullu nerukkaatissatut inassutigineqarnerani.

Kalaallit Nunaata kitaani misissuisoqarnikuunngilaq. Taammaatorli aarluk Nuup Kangerluani pisarineqartoq puisitorsimammat, aarluit annertuumik mingutsinneqarsimanissaat naatsoorsutigineqarsinnaavoq nerisaat aamma annertuumik mingutsinneqarmata.

Arluup pisarineqartup orsua, mattaa, tingualu ilumiuli allat tigusiffigineqarput misissugassanngorlugit taakkualu misissorneqareerpata qanoq mingutsinneqarsimatiginerat kingorna paasineqassasoq, Fernando Ugarte KNR-imut taama oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl