Pinngortitaleriffik nutaamik siulittaasortaarpoq
Pinngortitaleriffimmi siulittaasussamik nutaamik Naalakkersuisut pingasunngormat toqqaapput – toqqarneqarluni Inuit Issittormiut Kattuffianni, ICC-mi, Nunat Tamalaat akornanni Piujuartitsineq pillugu Ineriariartortitsinermut Siunnersortaasoq, Lene Kielsen Holm.
Lene Kielsen Holmip siulittaasussatut toqqagaaneranut misilittagai, tunuliaqutaa aamma maannamut atorfimminut atatillugu attavigilersimasai, ilinniagarisimasai minnerunngitsumillu oqaatsitigut piginnaaneqarluarnera pingaarnerutillugu tunngavilersuutigineqarput, tassami kalaallisut qallunaatullu assigiimmik oqaluttariarsornikkut, allattariarsornikkut atuarsinnaanikkullu Lene Kielsen Holmip piginnaasai assigiipput, tuliullu oqaasii atorlugit isumaqatiginninniarsinnaalluarluni.
Pinngortitaleriffik pillugu inatsit atuutilermalli ilaasortat manna tikillugu toqqagaasartut piffissalersuinerit atuuttut malillugit, Lene Kielsen Holm ukiup matuma naanissaata tungaanuugallartumik toqqagaavoq.
Lene Kielsen Holmip kingoraarpaa Nunatta Katersugaasiviani Allagaateqarfianilu pisortaq, Daniel Thorleifsen, siulittaasutut nammineerluni tunuarniuteqartoq.
