Pinngortitaleriffik miternik piserusuppoq

Tamanna taamanili qanoq allanngorsimanersoq Pinngortitaleriffimmi ilisimatusartut maanna paasinialerpaat, taamaammat illoqarfiit pingaarnersaanni aalisartut piniartullu matumuuna saaffigineqarput.

Nipisanniarnermi maanna aallartereerpoq, meqqillu ilarpassui aalisartut qassutaanni nassaarineqartarput. Aalisartut qassutiminni miternik pissataqarsimasut Pinngortitaleriffimmit tusarfigineqarusupput, miterlu ataaseq Pinngortitaleriffimmut tunniunneqartoq 40 koruunilerlugu apriilip qaammataani pisiarerusullugu. Meqqit katillugit 300-t pisiarerusunneqarput.

Meqqit ilisimatuut misissussappatigik pingaaruteqarpoq pisaqarnermi ulloq, meqqillu sumi pisarineqarnersut, allassallugit, qassutit qanoq ittut, qassillu, ningisimaneqarsimanersut, aamma qassuserfiusup itissusaa paaserusunneqarpoq. Aamma pingaaruteqarpoq, meqqit ataasiarluni qassusiarnermi pisarineqartut tamarmik Pinngortitalerfiffimmit tiguneqarnissaat, ilaannaat pinnagit.

Miternik katersinermi paasisitsissutigerusunneqarpoq Nuup eqqaani meqqit qassit pissataasarnersut, ukiut qulit ingerlaneranni aatsaat misissuisoqassalluni.

Meqqit pingasuugaangata ataaseq ukiut qulit matuma siorna tassa amerlasoortaqartarpoq - ilisimatuut ilimagaat kisitsit taamanimiit appariarsimassasoq, miterniartarnermi taamanimiit aamma annikillingaatsiarsimammat.

Maannakkut misissuinissamut pissutaavoq amerlasuut aqerlunik sanaat ukiuni marlunni tulliuttuni atorunnaarsikkiartuaarniarnissaat pilersaarutaasimammat.