Pinngortitaleriffik: Avatangiisigut sunnigaassapput

Saviminissamik ujarlernissamut isornartorsiuinerpaasut suut pingaartinnerusimaneraat radioaviisimit paasinarsarniaraavut.

Saviminissamik piiaanissamut akuersisoqassappat, London Miningip siunertaraa ilaatigut tuttoqarfissuaq aqqusaarlugu aqquserniortoqassasoq, ikaartarfiliortoqarluni tammaarsimaafiliortoqarlunilu.

London Miningip qinnuteqaataanut kingullermut tusarniaanermi akissutit maanna Aatsitassanut Pisortaqarfiup nerriviata qaavaniipput, akissutinilu eqqaamaqqusat isumakuluutillu tupinnanngitsumik uumasut avatangiisillu innarlerneqannginnissaat pingaartinneqarnerpaanut ilaapput.

London Miningip qinnuteqaataanut oqaaseqaasiorsimasut ilaatigut ukuupput: ICC, Avataq, Greenpeace, KANUKOKA, Kommuneqarfik Sermersooq, SIK aamma Nunamut Namminermut Pisortaqarfiup ataani Pinngortitamut Avatangiisinullu immikkoortortaqarfik.

Tusarniaanerni apeqquteqaatinut akissuteqartuuvoq ilisimatooq, Josephine Nymand. Taassuma oqaatigaa tupiginagu, London Miningip Isukasiani aatsitassarsiornissaa kikkunnit tamanit alapernaanneqarmat.

- Pilersaarutip nunarujussuarmi uumasut pinngortitarlu sunnertussaavai. Pilersaarutip qanoq annertutiginerujussua isornartorsiuisut paasigamikku tamanna tupaatiginerugunarpaat. Sunniutaasinnaasulli annikillisarneqarsinnaapput pilersaarusiorluarnikkut. Avaqqunneqarsinnaanngitsorli tassaavoq, sapaatip akunnerata ataatsip ingerlanerani umiarsuarujussuit marluk pingasulluunniit Kangerlukkut ingerlaartussaasassammata tamakkulu siornatigut takuneqarsimanngisaannarput.

Pinngortitaleriffimmi ilisimatooq tusarniaanermi apeqquteqaatinut akissuteqartuusut ilaat, Josephine Nymand oqarpoq.

Tusarniaanermi akissuteqaatini uumasut pinngortitallu mianerineqarnissaat pingaartinneqarluartunut ilaapput.

Isukasiata tungaanut aqquserniornermi ikaartarfiliornermilu, uumasut neriniarfinnaavat piaqqiorfiallu avaqqullugu sanaartortoqarsinnaanera eqqarsaatigineqartariaqartoq ICC-mit aamma Pinngortitaq Avatangiisillu pillugit qullersaqarfiup inassutigaat.

Josephine Nymandili isumaqarpoq aqquserniornermi, ikaartarfiliornermi tammaarsimaarfiliornermilu uumasoqarneq innarlerneqarnavianngitsoq.

- Sanaartorfiusussani tuttut uumasullu allat ajoqusersorneqarnissaat avaqqunneqarsinnaanngilaq. Oqaatigisariaqarporli tuttut ajoqusersorneqartussat sumiiffimmi mikisuaqqamiipput, sanaartorfimmillu tutut ungasissumiittut akornusersorneqarnaviaratik.

Nunatta Pinngortitaleriffianni ilisimatooq, Josephine Nymand oqarpoq.

Avatangiisit eqqissisimatinneqarnissaanik suliniaqatigiiffiup, Avatap isornartorsiutaanut ilaavoq tusarniaanermi paasissutissat tuluttuinnaq suliarineqarsimaneri.

Nuup Kangerluata Ikinngutaasa mamiagaat, pilersaarutip qanga inuusut pilersitaat kulturitsinnut attuumassuteqarluartut, soorlu ilivitoqqat, inussuliat allallut tammagartinneqassammata.