Pinngortitaleriffik: Arfattassat siornatut amerlatigisut
Tikaagullinnik 178-inik, tikaagulliusaanik qulingiluanik, qipoqqarnik qulinik arfivinnillu marlunnik kitaani ukioq manna pisaqartoqarsinnavoq, Tunumilu tikaagullinnik aqqaneq marlunnik pisaqartoqarsinnaasoq ilisimatusarnermut atatsimiititaliap IWC-mut siunnersuutigaa.
IWC-p ilisimatusarnermut atatsimiititaliaa Madeirami juunimi naapinneranni, ilisimatuut Pinngortitaleriffimmeersut Lars Witting aamma Mads Peter Heide-Jørgensen peqataaffigisaanni tamanna siunnersuutigineqarpoq.
Ilisimatusarnermut ataatsimiititaliap siunnersuutaa IWC-p ukiumoortumik ataatsimiinnerani, ullumimiit juunip 26-at ilanngullugu pisussami oqaluuserineqassaaq, arfattassallu amerlassusissaat tassani aamma isummerfigineqassasut, Pinngortitaleriffik nalunaarpoq.
Ilisimatusarnermut ataatsimiititaliami ataatsimiinnermi akuerineqarpoq, kitaani tikaagulliit 2007-mi 17.000-iusimasut. Kisitsinerit maannamut sukumeernissaata tamanna ersersippaa.
- Naak tikaagullittassanik siunnersuineq 200-niit 178-inut ikileriarsimagaluartut ukiumut pisassanit agguaqatigiissillugu amerlanerupput, Fernando Ugarte, Pinngortitalerfimmi immikkoortortaqarfimmi pisortaq oqarpoq.
Nutaamik siunnersueriaatsip taassuma iluaqutaa tassaavoq nungusaataanngitsumik pisaqartarnissamut naatsorsueriaatsimik
qularnaannerusumik tunngaveqarnera.