Pinngitsuutinneqartoq tigummigallagaassaaq
Nuup Eqqartuussiviani aalajangiineq unnerluussisunit Nunatta Eqqartuussivianut ingerlateqqinneqarpoq, 37-nik ukiullip pinerluuteqarnermut peqataasimanera inatsisilerinikkut apeqquserneqarmat.
Politimesterip tullia Morten Nielsen ima nassuiaavoq:
- Qanoq pisoqarsimaneranik Nunatta Eqqartuussivia naliliissasoq aalajangerpugut. Angutip 37-nik ukiullip aallaasersortoqarneranut atatillugu pinerluttulioqataasimanermut inatsisip atorneqarsinnaaneranut apeqqut Nunatta Eqqartuusivianut nalilersinniarlugu, suliaq Nunatta Eqqartuussivianut suliassanngortipparput, nassuiaavoq.
Nunatta eqqartuussiviata aalajangiinissaata tungaanut unnerluussisussaatitaasut 37-nik ukiullip tigummigallagassanngortinneqarnissaanik piumasaqarput. Sooq taama piumasaqarnersut pillugu Morten Nielsen ima oqarpoq:
- Nakuuserneq toqumik kinguneqartoq pillugu unnerluussisoqartillugu tigummigallagassanngortitsisoqarnissamillu tunngavissaqarpat, taava tamanna malinneqartariaqarpoq taamaaliorsimavugullu, Morten Nielsen oqarpoq.
Nunatta Eqqartuussiviata ualimut nalunaarutigaa, 37-nik ukiulik, sapaatip akunnerini sisamani, tassa marsip 18-ata tungaanut tigummigallarneqassasoq.
