Pinngitsoorani Aasiannut tulaanneqassapput
Aalisariutaatilimmut Sigguk A/S-imut Naalakkersuisunit qaleralittassiissutigineqarallartut, 1825 tonsit, immikkuullarissumik piumasaqaatitaqarsimasoq Naalakkersuisunit tunniunneqavippoq.
Qaleralittalli ukioq manna Aasiannut tulaassorneqarnissaat Naalakkersuisunit piumasaqaataavoq.
Sigguk A/S-ip Aasiannut tulaassuisinnaaneranik uppernarsaammik, Naalakkersuisut takusaqaqqaarusussimapput, maannakkullu Sigguk A/S-mut qaleralittassat 1825 tonsit Naalakkersuisunit tunniunneqavipput. Royal Greenland-i Aasianni aalisakkeriviuteqarpoq, qaleralinnulli akit Sigguk A/S-mit Polar Seafood-mit piginneqataaffigineqartumit isumaqatigineqarsimanngillat. Taamaammat Sigguk A/S pilersaaruteqarsimagaluarpoq, nammineerluni aalisakkerivimmik Aasianni pilersitsiniarluni, Naalakkersuisulli aalajangerput, qalerallit pisarineqarpata ingerlaannaq Aasiannut tulaassorneqassasut, aappaagornissaanullu utaqqissunneqassanngitsut.
- Suliffissuarmik pilersitsiniarnerat uagut tungitsinninngaannit aporfissalersorniarnngilarput. Uani pineqaannarpoq ukioq manna qalerallit taakkua ukioq manna nunami suliarineqassasut, akuersaarsinnaanngilarput, aappaagumut utaqqisoqarnissaa. Oqanngilagut pinngitsoornani Royal Greenland-mut tulaassorneqassasut, kisianni Aasiannut tulaanneqassapput, Sigguk A/S-ilu nammineerluni Royal Greenland-mut isumaqatigiinniassaaq, uagut akuliutissanngilagut, pingaarnerpaavorli Aasianni qaleralittat ukioq manna suliarineqarnissaat.
Immikkorluinnaq taakkua qaleralittassat pisassiissutaapput, taamaammat Nalakkersuisut aamma ikkikkorluinnaq piumasaqaateqarput. Aamma qinnuteqartitseqqinnermi piumasaqaatigineqarpoq, pinngitsoornani qaleralittat nunamut tulaanneqassasut, suliffissaqartitsiniarneq eqqarsaatigalugu.
Aalisarnermut Naalakkersuisoq Finn Karlsen taama oqarpoq.
Royal Greenland-ip pisortaa Henrik Leth oqarpoq Sigguk A/S-mit saaffigineqarsimallutik, aammalu Royal Greenland-ip qalerallit suliarisarumavai, taamaallaalli akit suli isumaqatigiissutigineqanngitsut, Royal Greenland nalunaarpoq.
