Pinngitsaaliisut pingasuungaangata ataaseq pinerluuteqaqqittarpoq

Pinngitsaaliillutik arnerinermik kinguaassiuutitigullu allatut pinerluuteqartartut pingasuungaangata ataaseq pineqaatissinneqarnermi kingornagut pinerluuteqaqqittarpoq, Danmarkimi misissuinerup tamanna takutippaa. Misissuinerup inerneri kinguaassiuutitigut nikanarsaanerit pitsaaliornerannut atorneqarsinnaalluarnerarneqarput.
Allattoq Louise M. Kleemann
decembarip 01-at 2008 12:55

Tarnip pissusaanik ilisimasallip Susanne Bensonip Århus Universitets Hospitalimeersup kinguaassiuutitigut pinerluuteqarsimasut arfinillit ukini 1978-miit 1992-imullu eqqarsartaasiisigut misissuiffigisimavai, misissuinerilli inerneri ullumikkut atorneqarsinnaapput.

Misissuisimanitta inerneri nunani allani misissuisimanerit inernerinut sanilliunneqarput, taakkualu takutippaat kinguaassiuutitigut pinerluuteqarsimasut katsorsarneqanngikkaangamik 30 proceniniit 40 procentit tikillugit pinerluuteqaqqittartut.

Kinguaassiuutitigut sakkortuumik pinerluuteqarajunnerusartut nangeqqittartullu tassaapput pinngitsaaliillutik arnerisartut aamma meeqqanut allallu meeraannut kanngunartuliortartut.

Misissuinerullu inerneri kinguaassiutitigut kanngunartuliornerit pitsaaliorneqarnissaannut atorneqarsinnaapput. Iluaqutaanerpaaq tassaagunarpoq kinguaassiuutitigut atuinerup iisartagartortitsinikkut millisarneqarnissaa. Taamaattorli katsorsaaneq assorsuaq tunuarsimaarfigineqarpoq kingunerisartagai imaannaangitsut pissutigalugit. Tamatumunnga taarsiullugu qanoq pissusilersornerup katsorsarnissaa kaammattuutigineqarpoq, tamannalu katsorsartinnermut iluaqutaanerpaamut tullersortuulluni. Pitsaaqutinut ilaavoq kinguaassiuutitigut atuinerup iisartagartortitsilluni millisarneqarneraninngarnit kinguaassiuutitigut pinerluuteqartartunut amerlanerpaanut naleqqunnerpaagami.

Taama oqarpoq tarnip pissusaanik ilisimasalik Susanne Benson Aarhus Universitets Hospitalimeersoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq