Naja Lyberth nunatsinni niviarsiaqqat tuusintilikkaat pinngitsaaliissummik spiralilerneqarsimasut ilagaat. Assi: Ann-Sophie Greve Møller.Assi: KNR

Pinngitsaaliissummik spiralilerneqarsimasoq: - Soorlu savinnik illissakkut kapoorneqarlunga

1966-ip 1975-illu akornanni kalaallit niviarsiaqqat tuusintilikkaat pinngitsaaliissummik spiralilerneqarsimapput. Naja Lyberth taamaaliorneqarsimasunut ilaasoq nalaassimasaminik maannamut suli kingunerlutsitsisarpoq. Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip podcastimik tusarnaagassiliareqqammisaani erserpoq.

Naja Lyberthip 1976-imi 14-inik ukioqarluni pinngitsaaliissummik spiralilerneqarami qanorpiaq pisoqarnersoq eqqaamarpianngilaa. Angut qaqortumik kiillilik eqqaamallatsiarpaa. Angut taanna peqqissaasuuvoq.

Taamani annilaangaqalunilu naameerusukkaluarluni akiuussinnaasimanani, Naja Lyberth oqarpoq.

Taamani spiralit, maanna spiralinit anginerusut, arnanut erninikuunngitsunut atugassiaanngillat. Naja Lyberthip taamani, tassa ukiut 46-t matuma siorna, anniarnini puiunngisaannarsimavaa.

- Taamani atoqateqarnikuunngisaannarlunga spiralilerneqarama anniartupilussuuvunga. Taamani putuneqarpunga. Spiralilerneqarama soorlu savinnik illissakkut kapoorneqarlunga. Tamannalu ukiorpassuarni aaqarnerluttarninnik kinguneqarpoq, Naja Lyberth oqarpoq.

Naja Lyberth danskit oqartussaasuisa naartunaveersaatit pillugit siunnersuinikkut qassinik qitorninissamut pilersaarusiorsinnaaneq pillugu suliniutaannut akuuvoq.1966-ip 1970-illu akornanni kalaallit arnat naartusinnaasuni spiralilerneqarsimasut 4.500-upput. Kisianni 1975-ip tungaanut spiralilersuisoqarpoq.

Tamanna DR-ip podcastimik tusarnaagassialiareqqammisaani ”Spiralkampagnen”-imi erserpoq.

Tusarnaagassiaq Spiralkampagnen
 
  • Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip podcastimik tusarnaagassiliareqqammisaani erserpoq.
  • 1966-ip 1975-illu akornanni kalaallit niviarsiaqqat tuusintilikkaat spiralilersinneqarput.
  • 1966-ip 1970-illu akornanni spiralilersinneqartut 4.500-upput.
  • Kalaallit Nunaanni arnat naartusinnaasut taamani 9000-upput.
  • Aperineqaqqaaratik spiralilersinneqarsimasuni arlallit tarnikkut timikkullu kingunerlutsitserujussuarnerannik kinguneqartumik qinigassinneqarsimanngitsutut misigisimapput. Anniaatigalugulu kingunerluutigisimagaat arlallit oqarput.
  • Niviarsiaqqanut ukiukitsunut, angajoqqaavi akuersiteqqaarnagit, spiralilersuineq danskit suliniuteqaleruttorneranni inatsisitigut akuerisaanngilaq. Taamaammat nakorsat naartunaveersaatinik niviarsiaqqanut 18-iliineqanngitsunut, angajoqqaavi akuersiteqqaarnagit, siunnersuisinnaalersillugit inatsit allanngortinneqarpoq. Tamanna nakorsat niviarsiaqqanut ukiukitsunut, angajoqqaavi akuersiteqqaarnagit, spiralileeqqusaanertut paasisimavaat. Tassa imaappoq, nakorsat inatsisinik unioqqutitsisimapput.
  • "Spiralkampagnen" P1-ikkut maajip ulluisa arfineq-pingajuanniit tusarnaarneqarsinnaalissaaq.

    Tusarfik: DR-podcast "Spiralkampagnen"

Danskit naalakkersuisuisa nunatsinni, Danmarkip taamanikkut amterisaani, kalaallit amerliartornerat aarlerigigalugu Spiralkampagnenimik taallugu suliniuteqalerput. Nunatsinni uersakkat ukiumut 500-uusartut uersarnerillu pingajorarterutaat 20-liineqanngitsuusut, 1965-imi nalunaarusiami erserpoq. Aamma kalaallit amerliartornerat danskit naalagaaffiannut kipiluttunarsisimavoq, nunatsinnimi nutarterinermini naatsorsuutigisaminit aningaasartuuteqarnerulermat.

Inatsisinik unioqqutitsillutik spiralilersuititsisimasut

Aperineqaqqaaratik spiralilerneqarsimasut qinigassinneqarsimanngitsutut misigisimapput. 60-inik ukiulik Naja Lyberth taakkununnga akuuvoq. Atuaqatinilu spiralilerneqassallutik Maniitsumi taamani nakorsaanermit oqarfigineqarsimallutik, Naja Lyberth oqarpoq.

- Spiralilersikkusunnersugut aperineqaqqaanngilagut. Itigartitsinissatsinnut periarfissinneqanngilagut, Naja Lyberth oqarpoq. Taanna maanna tarnip pissusiinik ilisimasaliullunilu kingunerluutit pillugit immikkut ilinniarsimasuuvoq.

Niviarsiaqqat tuusintilikkaat spiralilersimagini, Maniitsumi taamani nakorsaq tusarnaagassiami Spiralkampagnenimi oqarpoq. Spiralit taamani atorneqartut naartusinnaajunnaartitsisinnaasinnaasimammata niviarsiaqqanut ukiukitsunut atugassiaasimanngitsut, taanna oqarpoq

Naartunaveersaatinik niviarsiaqqanut ukiukitsunut, angajoqqaavi akuersiteqqaarnagit, siunnersuineq inatsisinik unioqqutitsinerusoq, danskit oqartussaasuisa suliniuteqarnerminni paasivaat. Taamaammat nakorsat naartunaveersaatinik niviarsiaqqanut 18-iliineqanngitsunut, angajoqqaavi akuersiteqqaarnagit, siunnersuisinnaalersillugit inatsit 1970-imi allanngortinneqarpoq. Inatsimmik allannguineq nunatta taamanikkut Landsrådianut saqqummiunneqarpoq.

Nakorsalli siunnersueqqusaalernertik niviarsiaqqanut ukiukitsunut, angajoqqaavi akuersiteqqaarnagit, spiralileeqqusaanertut paasisimagaat, Landsrådimi 1973-imi oqallinnermut imaqarniliami DR-ip pissarsiarisimasaani erserpoq. Tassa imaappoq, nakorsat inatsisinik unioqqutitsisimapput.

Naja Lyberthip angajoqqaavisa Naja spiralilertissimasoq ilisimasimanngilaat. Najap tamanna angajoqqaaminut aamma oqaluttuarisimanngilaa.

Aamma Naja atuaqatinilu spiralilertissimanerminnik eqqartueqatigiittarsimanngillat. Najallu spiralilerneqarsimanini timikkut kingunerluuteqaatigaa.

Naja aaqassaariartulerami timaa qisuariapiloorsimavoq, namminerlu isumaqarpoq tamanna spiralilersinneqarneranik peqquteqartoq.

Timi sivisuumik anigorsinnaanngisamilluunniit aseruunneqalersimasoq qisuariapiloortarpoq. 

- Spiralilerneqarnera ukiorpassuarni toqqortaraara. Ammasumik eqqartortanngilara. Spiralilerneqarninni anniarninnut eqqaanarsinnaasunik aaqarunnaariartulernermik aatsaat ersiuteqalerama utersaartalerpunga, taanna oqarpoq.

Timera nammineq pigileqqippara

Naja Lyberthip inuusukkallarami taaqqungalluni taartunillu imusunik nujaqarluni assinga angerlarsimaffiani illerup qaavaniippoq. Aamma nakorsat naalaartaataat assip taassuma qulaaniippoq.

Nakorsap naalaartarsimagaluarpani annilaangasoq paasisimassagaluaraa, Naja taanna oqarpoq.

Asseq alla aamma illerup qaavaniippoq. Akuaq, nakorsiartarfik atortullu savimerngit assimi tassani takussaapput. Asseq taanna nalaassimasaanik ullut tamaasa eqqaasitsisarpoq.

- Kingunerluutit kinguaariit tulliinut ingerlateqqissanngikkutsigit eqqartornissaat pingaaruteqarpoq. Taamaaliorneq qamuuna eqqissinartarmat, taanna oqarpoq.

Naja Lyberthip spiralilersinneqarnini Facebookimi 2017-imi ammasumik oqaluttuareqqaarpaa. Tamatuma kingorna arnanik allanik assingusumik nalaataqarsimasunik ujartuivoq.

Taassumammi misigisimasami oqaluttuarinissaa pingaartippaa.

- Taamani misigivunga naalagaaffiup illiara pigigaa, timigali killiliinikkut nammineq pigileqqippara. Timiga tarneralu nunasiaasimanermisut ikkunnaartut uani erseqqissassallugu pingaartippara. Spiralilersinneqarsimasuusugut inersimasunit illersornissaqanngilagut. Taamaaliorneqarnerput ilinniartitsisunut, nunatsinni politikerinut napparsimmavinniluunniit sulisunut isertuussaavoq. Tamanna ajorluinnarpoq, Naja Lyberth oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl